एमसिसीले काम गर्न थालिसक्यो : सञ्चारमन्त्री बाँस्कोटा

१६ माघ काठमाडौं । सञ्चार तथा सूचना प्रविधिमन्त्री गोकुल बाँस्कोटाले मिलिनियम च्यालेन्ज कर्पोरेसन (एमसिसी) संसदीय प्रक्रियामा गइसकेको हुदा यसले काम गर्न थालिसकेको बताएका छन्।

नियमित पत्रकार सम्मेलनमा मन्त्री बाँस्कोटाले एमसिसी संसदको पूर्ण बैठकबाट छिट्टै पारित हुने भन्दै यो सैन्य गठबन्धन नजोडिएको बताए। एमसिसी सैन्य गतिविधिसँग सम्वन्धित छ भन्नेहरुलाई उनले यति नम्बर बुँदामा छ भनेर खुलाउन समेत चुनौति दिए।

मन्त्री बाँस्कोटाले एमसिसी रोक्न खोज्नेहरुलाई जंगबहादुर राणाको प्रसङ्गको उदाहरण दिए। ‘जंगबहादुर राणा बेलायत भ्रमणमा जाँदा उनलाई बेलायतीहरुले नेपालमा सडक बनाउने प्रस्ताव राखेका थिए तर जंगबहादुरले त्यो सडकमा अंग्रेज सेना आएर मलाई नै दुःख दिने हुन्छ कि हुँदैन भन्ने प्रश्न समेत गरेका थिए बाँस्कोटाले भने। एमसिसीलाई पनि केही साथीहरुले त्यस्तै आशंका गरेको उनले बताए।

भारत र चीनबाट पनि अनुदान तथा ऋण सहायता लिँदा विभिन्न शर्त स्वीकार गरिएको भन्दै मन्त्री बाँस्कोटाले केही व्यक्तिले चर्चामा आउन एमसिसीलाई विवादमा पारेको बताए।