सवारीचालक अनुमतिपत्रको अनलाइन प्रणाली ह्याकरको निशानामा

१७ माघ, काठमाडौं । असाध्यै सुस्त, झन्झटिलो र असहज किसिमको सवारीचालक अनुमति पत्र (लाइसेन्स)को अनलाइन फारम प्रणाली ह्याकरको निशानामा परेको छ । तथापी यातायात व्यवस्था विभागले भने अनलाईन प्रणाली परिमार्जन गर्न लागिएकाले हाललाई सो सेवा बन्द गरिएको सुचना जारी गरेको छ ।

२१ औं शताब्दिको द्रुत इन्टरनेटको कुरा गरिरहने हाम्रो समाजमा यातायात व्यवस्था कार्यालयको वेवसाइट भने झुर नै रहेको छ । जसो तसो कामचलाउ अवस्थामा रहेको सो सर्भरमा बुटवल, पोखरालगायतका ठाउँको अनलाइन फारम प्रणालीमा ह्याकिङ भएको यातायात व्यवस्था विभागका महानिर्देशक गोगनबहादुर हमालले जानकारी दिएका छन् ।

सँधै जसो फारम भर्न अधिक लाेड पर्ने र लामाे समय खर्चिनुपर्ने सो पोर्टलबाट फारम भर्न सकिएन भनेर धेरै ठाउँबाट गुनासोसहित कार्यालयको टेलिफोन बज्न थालेपछि जाँचबुझ गर्दा पोखरा र बुटवलमा एउटै आईपी एड्रेसबाट अस्वभाविक रूपमा धेरै फारम भरिएको भेट्यिोएको थियो ।

अनलाईन फारममा समस्या आएपछि विभागले प्रहरीलाई पनि जानकारी गराएको छ । बिचौलियाहरुले बिहानै अनलाईन ह्याक गरेर पैसा तिर्ने सेवाग्राहीको फारम भर्ने गरेको समाचारहरु बाहिरिसकेका छन् । सोही कारण विभागले एउटा आइपी एड्रेसबाट सीमित फारममात्र भर्न मिल्ने गरी सिस्टम मिलाउने तयारी थालेको जनाएको छ । यस सम्बन्धमा थप जानकारी लिन खोज्दा सूचना अधिकारी तिर्थराज खनालले भने फोन उठाएनन् ।