नक्कली प्रहरी बनेर ठगी गर्ने पक्राउ

१७ माघ, काठमाडौं । नेपाल प्रहरीको सई ( प्रहरी नायब निरीक्षक ) हुँ भन्दै ठगी गर्ने एकजना पक्राउ परेका छन् ।

पक्राउ पर्नेमा काठमाडौं महानगरपालिका–९ बसुन्धरा बस्ने रामेछाप मन्थली नगरपालिका–२ टेकनपुर घर भएका २६ वर्षीय राजु कार्की छन् । उनलाई महानगरीय अपराध महाशाखाबाट खटिएको प्रहरीले कलंकीबाट पक्राउ गरेको हो ।

आफू प्रहरीको सई हुँ, काठमाडौं एयरपोर्टमा कार्यरत छु र आफूसँग बैंक खातामा धेरै रकम जम्मा भएकोले कतैबाट छानबिन भएमा अफ्ठेरोमा पर्न सक्छु भन्दै आफूसँग भएको ३० लाख रुपैयाँ दिने भनी कार्कीले सिन्धुपाल्चोक हेलम्बु घर भएका एक व्यक्तिबाट ३ लाख रुपैयाँ ठगी गरेको अनुसन्धान खुलेको प्रहरीले जनाएको छ ।

कार्कीले ती व्यक्तिलाई आफूसँग भएको ३० लाख खातामा हालिदिन्छु भनी बैंक ट्रान्जेक्सन देखाउन ३ लाखको चेक काट्न समेत लगाएका थिए । लगत्तै ३० लाख खातामा राखिदिन्छु र एउटै शाखाबाट उक्त रकम निकाल्न मिल्दैन भनी चाबहिलस्थित नेपाल बैंकको शाखामा लगि अलपत्र छोडी नेपाल बैंक लिमिटेड, कालिमाटी शाखाबाट नगद ३ लाख रुपैयाँ निकालेका थिए ।

कार्कीको साथबाट नगद ७ हजार ५ सय रुपैयाँ, बा ९१ प ७४४६ नम्बरको मोटरसाइकल, मोबाइल १ थान समेत बरामद गरी आवश्यक कारवाहीको लागि महानगरीय प्रहरी परिसर काठमाडौं पठाइएको उक्त महाशाखाले जनाएको छ ।