आजबाट चीनमा एक हजार शैयाको अस्पताल सञ्चालन

२० माघ एजेन्सी । चिनमा सोमबारबाट एक हजार शैयाको अस्पताल सञ्चालन आउने भएको छ । नोवेल कोरोना भाइरसको संक्रमणले महामारीको रुप लिएको चीनको वुहानमा अति तीव्र गतिमा निर्माण भएको अस्पताल सञ्चालनमा ल्याइएको हो ।

कोरोना भाइरसको संक्रमण भएका बिरामीको उपचारका लागि हप्ता दिनमा एक हजार शैयाको अस्पताल चीनले निर्माण गरेको हो । ८ दिनमा निर्माण सम्पन्न भएको अस्पताललाई सुविधा सम्पन्न बनाइएको चीनका अधिकारीले बताएका छन् । यस्तै १३ सय शैयाको अर्को अस्पताल पनि द्रूत गतिमा निर्माण भइरहेको छ ।

गएको डिसेम्बरमा हुबेइ प्रान्तको वुहानमा देखिएको नोवेल कोरोना भइरसको संक्रमण अहिले चीनसहित विश्वका विभिन्न देशमा फैलिएको छ । चीनमा हालसम्म ३६१ जनाको मृत्यु भएको पुष्टि भएको छ । चीनमा मात्रै १७ हजार भन्दा बढी मानिसमा संक्रमण पुष्टि भएको छ ।

चीन बाहिर नेपालसहितका देशमा गरी १५० जना भन्दा बढी संक्रमित भएका छन् । यस्तै आइतबार पहिलो पटक चीन बाहिर एकजनाको मृत्यु भएको छ ।

चीनको वुहानका ४४ वर्षका व्यक्तिको फिलिपिन्समा मृत्यु भएको हो । ती व्यक्ति फिलिपिन्स जानुअघि नै संक्रमित भएको पुष्टि भएको छ । विश्वका विभिन्न देशले चीनबाट आउने विदेशीहरुलाई आफ्नो देश प्रवेशमा रोक लगाएका छन् । यस्तै आफ्नै नागरिकको पनि क्वारेन्टाइन गरिरहेका छन् ।

चीनको राष्ट्रिय स्वास्थ्य संगठनले सोमबार दिएको जानकारी अनुसार २१ हजार ५५८ जनामा कोरोना भाइरसको संक्रमण भएको आशंका गरिएको छ । यस्तै एक लाख ५२ हजार ७०० जना स्वास्थ्यकर्मीको निगरानीमा रहेका छन् । ४७५ जना भने निको भएर अस्पतालबाट बिदा भएका छन्।

वुहानमा आइतबार निर्माण सम्पन्न भएको अस्पताल सोमबारदेखि सञ्चालनमा आउँदै छ । सो अस्पतालमा चिनियाँ आर्मीका १४ सय स्वास्थ्यकर्मी खटिएका छन् । यस्तै अर्को अस्पताल बुधबारसम्म बनिसक्ने छ ।