सर्बाधिक पुरस्कार राशिको बिश्वब्यापी नेपाली कविता प्रतियोगिता हुँदै

२० माघ काठमाडौं । सर्बाधिक पुरस्कार राशी सहित बिश्वब्यापी नेपाली कविता प्रतियोगिता हुनेभएको छ । प्रतियोगिता सगरमाथा साहित्य प्रतिष्ठान नेपालले आयोजना गर्न लागेको हो । सर्बोत्कृष्ट हुने कविले पचपन्न हजार पाँच सय पचपन्न रुपैयाँसहित प्रमाणपत्र पाउने छन् । यो राशी कविता प्रतियोगितामा अहिले सम्मकै सर्बाधिक पुरस्कार राशी रहेको कुरा संस्थाको अध्यक्ष कृष्ण बिश्वकर्माले बताए।

प्रतिष्ठानले बिश्वब्यापी नेपाली कविता प्रतियोगिताको तयारी पूरा गरि देश बिदेशमा रहने कविहरुबाट प्रतियोगिताको लागि कविता आव्हान गरेको छ। कविता फाल्गुन १ गतेसम्ममा संस्थाको इमेल मा पठाउनु पर्नेछ। प्रतियोगीताको लागि बढीमा एक सय पचास शब्दको गद्य कविता र बढीमा पाँच श्लोकसम्मका छन्द कविता पठाउन पनि संस्थाले जारी गरेको सुचनामा उल्लेख गरिएको छ । कविता नेपाली युनिकोडमा मात्र लेखी पठाउन भनिएको छ ।

कविता प्रतियोगिताको नतिजा २०७७ बैशाख १ गते घोषणा गरिने र उपयुक्त समय मिलाएर नेपालमा विशेष समारोह गरीने र सोही कार्यक्रममा सवोकृष्ट एकलाई नगद पुरस्कारकोसाथ सम्मान र अन्य उत्कृष्ट दस कविहरुलाई प्रमाणपत्र सहित सम्मान गरिने प्रचार(प्रसार संयोजक अजित क्षेत्रीले जनाएका छन्प्र । तियोगिताका उत्कृष्ट दससहित देश बिदेशका एकाउन्न कविका कविताहरु समेटेर संस्थाबाट एक बर्ष भित्रै कविता संग्रह प्रकाशित गरिने पनि जनाईएको छ।

प्रतियोगी कविता कुनै पनि राजनैतिक पूर्वाग्रह, गालीगलौज, साम्प्रदायिक सद्भावलाई खलल पार्ने खालका विचार र अश्लील शब्दहरुको प्रयोग गरिएको हुन नहुने बताइएको छ। अंग्रेजी र नेपाल अधिराज्य भित्र बोलिने कुनै पनि जनजातिका भाषामा लेखिएका कविताहरूले पनि प्रतियोगितामा प्रवेश पाउनेछन्। तर, उक्त कविताहरूका नेपाली रुपान्तरण पनि साथमै संलग्न हुनु पर्ने बताईएको छ। रचनाका साथमा कविको छोटो परिचय, पासपोर्ट साईजको फोटो, सम्पर्क ठेगाना र सम्पर्क नम्बरसमेत उल्लेख गरी सगरमाथा साहित्य प्रतिष्ठानको इमेलमा पठाउन संस्थाको फेसबुक पेजमा जारी सुचनामा आग्रह गरिएको छ।

कविता पूर्णत मौलिक, कुनै पनि छापा तथा अन्य कुनै माध्यमबाट प्रकाशित प्रसारित नभएको र साथै कुनै पनि प्रतियोगितामा सहभागी नभएको हुनुपर्ने पनि सगरमाथा साहित्य प्रतिष्ठान नेपालको प्रतियोगिताको संयोजक जिबित खड्काले जनाएका छन्। प्रतियोगिताले बिश्वभरी छरिएर रहेका नयाँ पुस्ताका कविहरुलाई थप उर्जा प्रदान गर्ने बिश्वास गरिएको प्रतिष्ठानका अध्यक्ष कृष्ण बिश्वकर्माले जानकारी दिए।