दोलखाका तत्कालीन सिडिओविरूद्ध पाँच मुद्दा

२० माघ काठमाडौं । दोलखाका तत्कालीन प्रमुख जिल्ला अधिकारी (सिडिओ) खगेन्द्रप्रसाद रिजालविरूद्ध अख्तियार दुरूपयोग अनुसन्धान आयोगले एकै दिन पाँच वटा मुद्दा विशेष अदालत काठमाडौंमा दायर गरेको छ।

रिजाललाई आयोगले आफ्नो क्षेत्राधिकारभित्रका मुद्दाका अभियुक्तहरूलाई धरौटीमा रिहा गर्न घुस लिएको आरोपमा अनुसन्धान गर्न नियन्त्रणमा लिएको थियो। उनले विभिन्न मुद्दासम्बन्धी केस लाग्ने तथा कारागारको डर, त्राससमेत देखाई गालीगलौज गरी फरक फरक सेवाग्राहीसँग ५० हजार, ९० हजार, ३५ हजार, ४ लाख लिएको आयोगले पुष्टि गरेको छ। साथै, उनले अनुगमनमा नगई ७७ हजार ६ सय रुपैयाँ भ्रमण भत्ता बुझेको पाइएको आयोगले जनाएको छ।

रिजालविरूद्ध विभिन्न पाँच वटा मुद्दामा ६ लाख ५२ हजार ६ सय रुपैयाँ बिगो माग गर्दै आयोगले मुद्दा दायर गरेको हो।