आइसिसी विश्वकप लिग–दूई : ओमानद्वारा नेपाल सामू १९८ रनको लक्ष्य प्रस्तुत

२२ माघ काठमाडौं । तीन राष्ट्र सम्मिलित आइसिसी विश्वकप लिग–दूई त्रिकोणात्मक शृङ्खला अन्तगर्त ओमानले क्रिकेट विश्वकप लिग २ खेलमा नेपाललाई १ सय ९८ रनको लक्ष्य दिएको छ । टस जितेर फिल्डिङ रोजेको ओमानले निर्धारित ५० ओभरमा ९ विकेट गुमाई १ सय ९७ रन बनाएको हो ।

कप्तान ज्ञानेन्द्र मल्लले टस जितेपछि ब्याटिङमा आएको ओमानबाट मोहम्मद नदिमले सर्वाधिक ६९ रन बनाए। ९६ बल खेलेका उनले ५ चौका र २ छक्का प्रहार गरे। अर्का अविजित ब्याट्सम्यान बिलाल खानले ८ रन बनाए।

ओमानबाट अन्य खेलाडीमा जतिन्दर सिंह ४, खावर अली ५, अकिब इलयास १६, सन्दीप गौड ३३, बादल सिंह ५, नसिम खुशी २८ र कलिमुल्लाह १ रन बनाई आउट भए। नेपालबाट करण केसीले ४ विकेट लिए। ओमानका ओपनरद्धय जतिन्दर र खावर अलीलाई आउट गरेका करणले ९ ओभरमा १ मेडन राख्दै ४७ रन खर्चे।

एकदिवसीय अन्तर्राष्ट्रियमा डेब्यु गरिरहेका सुसन भारीले उत्कृष्ट बलिङ प्रदर्शन गरे। उनले १० ओभरमा १ मेडन राख्दै १४ रन खर्चेर ३ विकेट लिए। उनले एकै ओभरमा कप्तान जेसन मक्सुदलाई २० र सुरज कुमारलाई शुन्यमा आउट गरी नेपाललाई खेलमा हावी बनाएका थिए। अर्को एक विकेट दीपेन्द्रसिंह ऐरीले लिए।

डेब्यु गर्ने अर्का खेलाडी अविनाश बोहराले ९ ओभरमा २ मेडन राख्दै ३८ रन खर्चिए । सन्दीप लामिछानेले १० ओभरमा १ मेडन राख्दै ४५ रन खर्चेर कुनै विकेट लिन सकेनन्। नेपालले घरेलु मैदानमा पहिलो एकदिवसीय अन्तर्राष्ट्रिय खेलिरहेको हो। लिग २ मा नेपालको यो पहिलो खेल हो भने ओमानले ८ खेल खेलिसकेको छ।

ओमान ४ जितका साथ ७ राष्ट्र सहभागित प्रतियोगिताको चौथो स्थानमा छ। नेपालले सन् २०१८ मा जिम्बावेमा भएको विश्वकप छनोटबाट एकदिवसीय अन्तर्राष्ट्रिय मान्यता पाएको थियो।