घर बनाउदै हुनुहुन्छ भने यी स्टिल कम्पनीहरुसंग सजक रहनुहोला,गुणस्तरहीन भेटिए यी कम्पनी

२३ माघ काठमाडौं । देश बनाउने जिम्मेवार सहितका नारा घन्काउने नेपालका तीन स्टिल कम्पनी कारबाहीमा परेका छन् ।

आकर्षक नारा दिएर बजार तानेका कम्पनीले नाराको त अलग कुरा आफ्नो मापदण्डअनुसार पनि उत्पादन नगरेपछि नापतौल विभागले कारबाही गरेको छ । नेपाल सरकार उद्योग, बाणिज्य तथा आपूर्ति मन्त्रालय अन्तर्गतको नेपाल गुणस्तर तथा नापतौल विभागले चेकजाँच गर्दा गुणस्तरहीन भेटेपछि विभागले गोदावरी स्टिल्स रौतहट, गोयन्का स्टिल्स रुपन्देही र अशोक स्टिल्स बारालाई कारबाही गरेको हो ।

विभागले अशोक स्टिल्सलाई टीएमटी बार १२ एमएम साइजका स्टिल्सको मापदण्ड नपुगेको भन्दै उक्त साइजका सम्पूर्ण उत्पादनको बिक्रीमा रोक लगाइ बजारबाट फिर्ता ल्याउन र स्पष्टिकरण माग गरेको छ । विभागले इलोङगेसन कम्तीमा १२ प्रतिशत हुनुपर्नेमा ११.६७ प्रतिशत मात्रै भएको उल्लेख गर्दै बेन्ड टेस्ट पनि गुणस्तरको १९.१ अनुरुप नभएको बताएको विभागका महानिर्देशक विश्ववावु पुडासैनीले जानकारी दिए ।

विभागले गोदावरी स्टिल्सले टीएमटी बार ८ एमएम साइजको स्टिल्स ५०० ए÷एमएम २ को गुणस्तर हुनुपर्नेमा ४६१ मात्रै उत्पादन गरेकाले इजाजत पत्र स्थगन गरेको छ । साथै गोयन्का स्टिल्सले पनि टीएमटी बार ८ एमएम साइजका स्टिल्सको बेन्ड टेस्ट १९.१ अनुरुप नभएको भन्दै इजाजतपत्र स्थगन गरेको हो ।