कोरोना भाइरसको संक्रमणबाट सुरक्षित हुन एनआरएनको आह्वान

२३ माघ काठमाडौं । केही समय यता चीनको उहान क्षेत्रबाट फैलिएको नोभेल कोरोना भाइरस संक्रमणबाट सुरक्षित हुन एनआरएनको आह्वान गरेको छ ।

गैरआवासीय नेपाली संघ (एनआरएन) ले बिहिबार एक प्रेस विज्ञप्ति जारी गर्दै अन्तर्राष्ट्रिय स्वास्थ्यमा आपतको स्थिति खडा गरिसकेको हुदा सबैलाई सजक हुन आह्वान गरेको हो । प्रवक्ता डि.बि. क्षेत्रीको हस्ताक्षर रहेको विज्ञप्तिमा भनिएको छ “गैरआवासीय नेपाली संघ यस भाइरसको संक्रमणको कारणले मृत्यु भएका व्यक्तिहरुको आत्माको चीरशान्तीको साथै संक्रमित व्यक्तिहरुको शिघ्र स्वास्थ्य लाभको लागि कामना गर्दछ । साथै यस प्रकोपबाट प्रभावित सबैमा सहानुभूति प्रकट गर्दछ ।”

गैरआवासीय नेपाली संघ राष्ट्रिय समन्वय परिषद् चीनले उहानमा रहेका १४० भन्दा बढी नेपालीहरु संग संपर्कमा रहेको र उनीहरुलाई नेपाली दूतावास बेइजिङ्ग संगको समन्वयमा नेपाल फिर्ता गर्ने संबन्धमा सक्रिय रुपमा कार्य गरिरहेको एनआरएनले जनाएको छ ।