तपस्वीको भेषमा रहेका बमजन बेपत्ता, आश्रमबाट चार जना पक्राउ

२४ माघ, काठमाडाैं । विवादास्पद छविका तपस्वी रामबहादुर बमजन सिन्धुलीस्थित आश्रमबाट भागेको प्रहरीले जनाएको छ । आफ्ना अनुयायी तथा आनीलाई आश्रमबाट बेपत्ता पारेको आरोपमा बमजनलाई पक्राउ गर्न सर्लाही जिल्ला अदालतले आदेश दिए लगत्तै प्रहरी पुग्दा फेला पार्न नसकेको सिन्धुली प्रहरीले बताएको छ ।

सर्लाही प्रहरी प्रमुख विश्वमणि पोखरेलका अनुसार, बमजनलाई पक्रन सिन्धुली प्रहरीको साथमा पुगेका प्रहरी रित्तै फर्कनु परेको छ । हिजो बेलुकी नै पक्राउ पूर्जी जारी भएको तर आज बिहान हामी पक्रन जाने सल्लाह भएकोमा उक्त सूचना चुहिएको हुन सक्ने अनुमान एसपी पोखरेलले लगाए ।

बमजन धेरै टाढा नगई वरिवरिको जंगलमा लुकेको हुन सक्ने अनुमानका साथ हामी खोजी गरिरहेका छौं – पोखरेलले भने । बमजन फेला नपरेपनि आश्रमबाट प्रहरीले चार जनालाई भने पक्राउ गरेको छ ।

सिन्धुली प्रहरी प्रमुख श्यामबहादुर खत्रीले पनि बमजन आश्रममा फेला नपरेको पुष्टी गरेका छन् । अहिले वरिपरीको जंगल क्षेत्रमा कुकुरको सहयताले हामी उनलाई खोजिरहेका छौं – प्रहरी प्रमुख खत्रीले भने ।

बमजनले आश्रमबाट अनुयायी र आनीलाई बेपत्ता पारेको आरोप लामो समयदेखि लागिरहेको छ । सर्लाहीकी रिता बोट, नुवाकोटकी कर्मा तामाङ, मकवानपुरकी फुलमाया रुम्बा, सुरेश आले मगर सञ्चमान वाइवालाई बेपत्ता पारेको आरोपमा उनलाई पक्राउ गर्न लागिएको हो ।