कांग्रेसले आज पनि संसद् अबरुद्ध गर्ने

२४ माघ, काठमाडौं । राजनीतिक पूर्वाग्रह साँध्दै अख्तियार दुरुपयोग अनुसन्धान आयोगले पार्टी उपसभापति एवं संसदीय दलका उप नेता विजयकुमार गच्छदार विरुद्ध मुद्धा दायर गरेको विरोधमा आज पनि संसद् चल्न नदिने निर्णय नेपाली कांग्रेसले गरेको छ ।

आज बिहान सिंहदरबारस्थित संसदीय दलको कार्यालयमा बसेको बैठकले आजको प्रतिनिधिसभा बैठक चल्न नदिने निर्णय गरेको छ । संसदीय दलका सचेतक बालकृष्ण खाँणका अनुसार, प्रधानमन्त्री केपी ओली सरकारको लाचार छायाँका रुपमा रहेको अख्तियार प्रमुखले निर्णय नसच्याएसम्म संसद्मा अवरोध जारी रहने छ । प्रतिनिधिसभाको बैठक आज अपरान्ह १ बजेका लागि निर्धारण गरिएको थियो ।

साथै प्रतिनिधिसभाको आजको बैठकमा आफ्ना धारणा राखेर बैठक अवरोध गर्ने निर्णय भएको उनले जानकारी दिए । उनले जग्गा खरिद गरेका व्यक्तिलाई भने उन्मुक्ति दिन खोजेको आरोप लगाए । यही माघ २२ गते अख्तियार दुरुपयोग अनुसन्धान आयोगले बालुवाटारको जग्गा प्रकरणमा उपसभापति गच्छदारलगायत विभिन्न व्यक्तिविरुद्ध विशेष अदालतमा मुद्दा दायर गरेको थियो ।