प्रेस यूनियन सम्बद्ध पत्रकारलाई चुनावी चटारो

२४ माघ, काठमाडौं । नेपाल प्रेस यूनियन सम्बद्ध पत्रकारहरु यतिबेला महाधिवेशनको तयारीमा जुट्न थालेका छन् ।प्रजातन्त्रवादी पत्रकारहरुको छाता संगठन नेपाल प्रेस युनियनको चितवन वैठकले नवौं महाधिवेशन आगामी चैतमा हुने घोषणा गरेपछि अधिवेशन सम्पन्न हुन बाँकी जिल्ला शााखाहरुलाई चुनावी चटारोले छोएको हो ।

विभिन्न विवाद र बाहानामा रोकिएका जिल्ला शााखा मध्ये तनहुँ, नुवाकोट र महोत्तरीको यही माघ २५ गते, ललितपुर र सोलुखुम्बु शाखाको माघ २७ गते, काठमाडौं शाखाको माघ २८ गते तथा बाँके, सिन्धुपाल्चोक र बारा शाखाको माघ २९ गते अधिवेशन हुने मिति तोकिएपछि पत्रकारहरुलाई चुनावी सरगर्मीले छोएको छ । चितवन बैठकले माघ मसान्तभित्र बाँकी सबै जिल्ला शाखाहरुको अधिवेशन गरिसक्ने निर्णय गरेको थियो ।

करिब छ बर्षको अन्तरालपछि नेपाल प्रेस युनियनको केन्द्रिय महाधिवेशन आगामी चैत्र २१ र २२ गते नेपालगन्जमा हुने भएको छ । पटक पटक घोषणा हुँदै रोकिदै आएको यूनियनको यो पछिल्लो घोषणाले पत्रकारहरुमा उत्साहको संचार गराएको छ । यद्दपि नवौं महाधिवेशन तोकिएकै समयमा हुने कुरामा कतिपय आशंका र चुनौतीहरु भने विद्यमान नै छन् ।