राजकुमारी प्रेरणाको दाइजो र सर्वोच्चको फैसला:- अदालत अन्यायको साक्षी र मतियार बन्यो

♦ केशवप्रसाद भट्टराई

सन्तान नभएका थुप्रै नेपाली नेताहरूका सम्पत्ति कुनै कारणले उनीहरूको निधन भयो भने त्यसपछि उनीहरूको सम्पत्ति पनि राज्यको हुने हो ? राजा बीरेन्द्र र उनका सवै हकवालाको हत्या भयो । उनका नजिकका नातेदारमा राजकुमार ज्ञानेन्द्र मात्रै जीवित रहे ।

नेपालको कानुन अनुसार ज्ञानेन्द्र राजा बीरेन्द्रको निजी सम्पत्तिका हकवाला हुन् । हकवाला भएका कारण कानुन बमोजिम उनको नाउँमा आएको सम्पत्तिको कुनै भाग उनले आफ्नी छोरीलाई दिए । पछि सरकारले राजा बीरेन्द्रको सम्पत्ति सरकारीकरण गर्ने निर्णय गरे अनुसार प्रेरणालाई राजा ज्ञानेन्द्रले दिएको जमिन पनि सरकारीकरण गरेछ ।

एक त बीरेन्द्रको नाउबाट ज्ञानेन्द्रको नाउमा आएको सम्पत्तिलाई सरकारीकरण गर्ने निर्णय नै गैह्रकानुनी र अन्यायपूर्ण हो । त्यसमाथि छोरीले बाबुबाट पाएको सम्पत्ति खोस्नु झन् अन्याय हो ।  हाम्रो धर्म र संस्कृतिमा पनि स्त्रीधनलाई खोस्नु महापाप मानिन्छ ।

नागरिक सरह भएका राजा ज्ञानेन्द्रले अन्य नागरिक सरह अपुतालीको हक पाएनन । यो त सडकमा हिरो हुन सरकारबाट भएको स्वेच्छाचारी निर्णय हो ।व्यक्तिको सम्पत्तिको अधिकारको हनन हो । राजा बीरेन्द्रको यसरी सरकारीकरण भएको जग्गा जमिनको ९० प्रतिशत अंश सत्तारूढ दल र सरकारका प्रमुख नेतृत्वहरू निकटको एक व्यापारिक समूहलाई कौडीको भाउमा सरकारले बकस दिएको समाचार माध्यमहरूले भनिरहेका छन् ।

झन् गम्भीर कुरो त अदालत पनि सरकार र सडकलाई खुशी पार्न त्यो अन्यायमा साझेदार बन्यो । त्यो अन्यायलाई अहिले प्रमाणीकरण गरिदियो अदालतले । अदालत अन्यायको साक्षी र मतियार बन्यो ।

राजा बीरेन्द्र र ज्ञानेन्द्रको सम्पत्ति बारेको सरकारको निर्णयलाई आधार मान्ने हो भने त सन्तान नभएका थुप्रै नेपाली नेताहरूका सम्पत्ति कुनै कारणले उनीहरूको निधन भयो भने त्यसपछि उनीहरूको सम्पत्ति पनि अब राज्यको हुने भयो । त्यस्तै स्थितिमा अदालतका न्यायाधीशहरूको हकमा पनि त्यही हुने भयो । अनि जनताको हकमा पनि त्यही लागु हुने भयो ।