प्रधानमन्त्री ओली एकाएक अस्वस्थ !

२६ माघ, काठमाडौं । प्रधानमन्त्री समेत रहेका नेपाल कम्युनिष्ट पार्टीका अध्यक्ष केपी ओली आज बिहानदेखि अस्वस्थ भएका छन् । प्रधानमन्त्रीसँग बिहानैदेखि भेटघाट गर्न तय गरिएको कार्यक्रम एक्कासी रद्ध गरिएको स्रोतले बताएको छ ।

बिहानको भेटघाटका लागि आएका कतिपय नेता कार्यकर्ता बालुवाटार पुगेपछि फर्किएका थिए । प्रधानमन्त्री ओलीलाई के भएको भनेर सचिवालयले खुलाएको छैन । तर उनलाई एक्कासी टाउको दुखेको र रिंगटा चलेको स्रोतले बताएको छ ।

बिहानैदेखि निजी चिकित्सकहरु उपचारका लागि बालुवाटार पुगेका छन् । प्रधानमन्त्री बिरामी भएको पुष्टि महासचिव विष्णु पौडेलले गरेका छन् । उनले आज बस्ने भनिएको सचिवालय बैठक समेत रद्ध भएको जानकारी सचिवालय सदस्यहरुलाई दिएका छन् ।

बेलुकी ३ बजेका लागि सचिवालय बैठक तय भएको थियो । हिजो बेलुकी ओली र पुष्पकमल दाहाल ‘प्रचण्ड’ बसेर पार्टी एकता प्रकृयालाई टुंग्याउन सचिवालय बैठक डाक्न सहमत भएका थिए ।