८ विकेटकाे लज्जास्पद हार

२६ माघ, काठमाडौं । ओमानसँग नै पहिलो खेल १८ रन अन्तरले हारेको नेपालले आज ८ विकेटको लज्जास्पद हार व्यहोरेको छ । ओमानका अकिब इलियासले अविजित रहँदै १०६ बल सामन गरे । उनले १०९ रन हानेपछि नेपाली खेलाडीको कुनै जोड चलेन ।

ओमानले जारी क्रिकेट विश्वकप लिग २ मा लगातार तेस्रो विजय हात पारेको छ । त्रिवि क्रिकेट मैदान कीर्तिपुरमा आज टस हारेर ब्याटिङममा आएको नेपालले निर्धारित ५० ओभरमा ८ विकेट गुमाइ २४९ रनको योगफल बनायो । तर, ओमानले १६ बल बाँकी हुँदा उक्त लक्ष्य भेट्टाएको थियो ।

यो खेल सँगै इलियाजले एकदिवसीय अन्तर्राष्ट्रिय क्रिकेटमा पहिलो शतक प्रहार गरेका छन् । कप्तान जिसन मक्सुद ६८ रन बनाइ अविजत रहे। दुवैको एकदिवसीय अन्तर्राष्ट्रिय खेलमा यो नै उच्च स्कोर बनेको छ । इलियाजले १२ चौका र १ छक्का प्रहार गरे । मक्सुदले ७८ बल खेली ८ चौका प्रहार गरे । ओपनर जतिन्दर सिंह २३ रन बनाइ कुशल मल्लको बलमा बोल्ड भए भने खावर अलीलाई सुसन भारीले ४१ रनमा बोल्ड गरे । यसजित सँगै ओमान लिग २ को अंक तालिकामा शीर्ष स्थानमा उक्लिएको छ । ओमानले ९ खेलमा ७ विजय हात पार्दै १४ अंक जोडेको छ ।

अमेरिका १० खेलमा ६ विजय हात पार्दै १२ अंकको साथ दोस्रो स्थानमा छ । नेपालले ३ मध्येको दोस्रो हार व्यहोरेको हो । दुवै हार ओमानसँग रहेको छ । त्रिकोणात्मक शृंखलामा शनिबार नेपालले अमेरिकालाई ३५ रनले हराएको थियो । आउँदो बुधबार नै नेपालले अमेरिकासँग फेरि दोस्रो खेल खेल्नेछ ।

दुई पटक ‘जीवनदान’ पाएका अकिब इलियासले २५ औं ओभरको पाँचौ बलमा आरिफ शेख र ३३ औं ओभरको तेस्रो बलमा दीपेन्द्र सिंह ऐरीले गर्न नसकेको क्याचको राम्रो फइदा उठाए । आज बनाएको याेगफल भने एकदिवसीय अन्तर्राष्ट्रिय (ओडीआई) क्रिकेटमा नेपालको दोस्रो ठूलो स्कोर हो । तर घरेलु मैदानमा घरेलु दर्शकको साथ पाएको नेपालले ओमानी ब्याट्सम्यानको विकेट झार्न नसक्दा ७ वर्षपछि पराजित गर्ने सपना अधुरै हुन पुगेको छ ।