अभिभावकले गुहारे आयोग

२३ माघ, काठमाडौं । काेराेना भाइरसले आक्रान्त बनाएकाे चीनको बुहानमा बसेका १८० जना नेपाली विद्यार्थीलाई नेपाल फर्काउन प्रधानमन्त्री केपी शर्मा ओली नेतृत्वको सरकारले आलटाल गरेपछि तिनका अभिभावकले आज राष्ट्रिय मानव अधिकार आयोगलाई गुहारेका छन् ।

विद्यार्थीका अभिभावकहरु आज दिउँसो पुल्चोकस्थित आयोगको कार्यालयमा गई मानव अधिकारको रक्षा गर्न सरकारलाई दवाब बढाउन आग्रह गरेका छन् । अभिभावकले आयोगका अध्यक्ष अनुपराज शर्मालाई भेटी तत्काल नेपाली विद्यार्थीलाई स्वदेश फर्काउने पहल थालिदिन अनुरोध गरेका छन् ।

भेटका क्रममा उनीहरुले ज्ञापनपत्र समेत बुझाएका थिए । ज्ञापनपत्रका सरकारले कहिले फर्काउने हो, त्यसको तिथि मिति तोकिदिन आग्रहसमेत गरिएको छ । पीडित अभिभावकले यसअघि स्वास्थ र परराष्ट्रमन्त्रीसँग पनि यस्तै ज्ञापनपत्र बुझाएका थिए ।

पीडित मध्येका एक अभिभावकले बुहानमा रहेका आफ्ना छोरा डा. गौरव पोखरेलसँग आयोग अध्यक्ष शर्मासँग फोनबाट कुरा गराएका थिए । सो अवसरमा अध्यक्ष शर्माले बुहानमा फसेका नेपालीहरुको अवस्थाबारे जानकारी लिएका थिए । कुराकानीका क्रममा डा. पोखरेलले आफूहरु मानसिक तनावमा बस्नु परेकोले तत्काल स्वदेश फर्काउन सरकार समक्ष पहल गरिदिन आग्रह गरेका थिए ।