१८० नेपाली विद्यार्थी लिन एयरबस चीन जाने

२७ माघ, काठमाडौं । नेपालमा रहेका आफन्त, अभिभावक र मानव अधिकार आयोगको दवाबपछि प्रधानमन्त्री केपी शर्मा ओली नेतृत्वको सरकारले कोरोना भाइरस प्रभावित चीनको बुहानमा रहेका नेपालीहरुको उद्धार हुने भएको छ । त्यहाँ रहेका नेपाली विद्यार्थी लिनका लागि नेपाल एयरलाइन्सको वाइडबडी (एयरबस ३३०) विमान चीन जाने भएको छ ।

अबको ५ दिनपछि अर्थात् फागुन ३ गते जहाज चीन जाने सरकारका एक उच्चअधिकारीले बताएका छन् । हिजो मात्रै मानअधिकार आयोगले बुहानमा रहेका नेपालीलाई जतिसक्दो चाँडो उद्धार गर्न आग्रह गरेको थियो । आफ्ना छोराछोरीको छिटो उद्धार गरिदिन माग गर्दै आफन्त तथा परिवारका सदस्यहरुले गृह मन्त्रालय, पर्यटन मन्त्रालय, स्वास्थ्य मन्त्रालय, मानव अधिकार आयोग लगायतको पटक पटक ध्यानाकर्षण गराएका थिए ।

वुहानबाट करिब १८० जना नेपालीहरुलाई बेइजिङस्थित नेपाली दूतावाससँगको समन्वयमा सरकारले उद्धार गर्ने जनाएको छ । पर्यटन मन्त्रालय स्रोतका अनुसार त्यसका लागि पर्यटन, स्वास्थ्य मन्त्रालय, परराष्ट्र र नेपाल एयरलाइन्सका प्रतिनिधिहरु सहितको समिति पनि बनेको छ ।