फुटबलका राजा जसलाई अहिले हिँडडुल गर्न ह्वीलचेयर अनिवार्य !

२८ माघ एजेन्सी । ब्रजिलका महान् फुटबल खेलाडी पेले अचेल बिनासहारा हिँडडुल गर्न नसक्ने भएका छन् । पेलेका छोरा एडिन्योका अनुसार हिजोआज उनी घरबाहिर निस्किन पनि सङ्कोच मान्छन्।

तीन पटक विश्वकप विजेता तथा अहिलेसम्मकै सबैभन्दा उत्कृष्ट फुटबल खेलाडी मानिएका पेलेलाई गत वर्ष मूत्रनलीमा सङ्क्रमण भएपछि अस्पताल लगिएको थियो। उनन्सत्तरी वर्षीय पेलेलाई केही समययता कम्मरमा समस्या देखिएको छ। उनलाई हिँडडुल गर्न फ्रेमको सहारा आवश्यक पर्छ।

गएको वर्ष युरिनरी इन्फेक्सन भएपछि उनलाई अस्पताल लगिएको थियो । अहिले उनको कम्मरमा पनि समस्या आएको छ । जसका कारण उनी अरुको सहयोगबिना यताउता पनि हिँड्न सक्दैनन् । उनलाई ह्वीलचेयर अनिवार्य जस्तै भइसकेको छ । केही सार्वजनिक कार्यक्रमहरुमा पनि पेले ह्वीलचेयरमा देखिएका छन् ।

पेलेले करियरमा कुल १ हजार ३ सय ६३ खेलमा १ हजार २ सय ८१ गोल गरेका छन्, जुन कीर्तिमान अहिलेसम्म कसैले पनि तोड्न सकेको छैन । तीन पटक ब्राजिललाई विश्वकपको उपाधि जिताएका पेलेले ९१ अन्तर्राष्ट्रिय खेलमा ७७ गोलसमेत गरेका छन् ।

पछिल्लो समय उनको स्वास्थ्य अवस्था दयनीय बन्दै गइरहेको छ । ‘एउटा राजा जसलाई अहिले हिँड्न पनि सहारा चाहिन्छ, यो अवस्था उनलाई सह्य छैन,’ पेलेका छोराले भने । ‘उनी अहिले कमजोर भएका छन्। उनको कम्मरको समस्याका कारण हिँडडुल गर्न निकै कठिन छ । जसका कारण उनलाई डिप्रेसन जस्तै भएको छ,’ इडिन्होले थपे ।