नेपाल वायुसेवा निगमको कर्मचारी बढुवामा अख्तियारको छानविन

१ फाल्गुण, काठमाडौं । नेपाल वायुसेवा निगमको कर्मचारी बढुवामा ठुलो चलखेल देखिएको छ । नेपाल वायुसेवा निगमले कार्तिकमा गरेको ६ तहको ५ वटा बढुवा र ९ तहको ८ वटा बढुवामा ठूलो अनियमितता भएको भन्दै अख्तियारमा उजुरी परेको छ ।

कार्य मुल्यांकन भन्दा पनि नातावादमा निगम फसेको भन्दै उजुरी परेको हो । निगमले २०७६ कार्तिक ५ गते प्रकाशित गरेको कार्यक्षमता मुल्यांकन बढुवा सिफारिसमा केहि सिफारिस नियम मिचेरै गरेको भन्दै उजुरी परेको हो ।

उजुरीमा भनिएको छ “ बिपरित कार्यसम्पादन मुल्यांकन पुनरावलोकन समितिले पक्षपातपुर्ण ढङ्गले सुनियोजित तरिकाले बिना आधार जथाभावी अंक चढाई अनियमितता गरेकोले यस सम्बन्धि आवश्यक छानविन गरिपाउ । “ नेपाल सरकारको एकमात्र एयरलाइन्स नेपाल एयरलाइन्समा देखिएको यो विवादले नेपाल सरकारले अघि सारेको नेपाल भ्रमण बर्ष सफल हुनेमा पनि आशंका उत्पन्न हुन्छ ।

बेलैमा यसमा छानविन हुन नसके कर्मचारी विवादकै कारण एयरलाइन्स धारासायी हुने देखिन्छ । अख्तियार दुरुपयोग अनुसन्धान आयोगले भने यस बिषयमा बोल्न नमिल्ने भन्दै काम कारबाही अगाडि बढिरहेको जनाएको छ ।