अडियाे काण्डपछि सञ्चारमन्त्री बाँस्कोटाले दिए राजिनामा

८ फागुन, काठमाडाैं । सँधै कडा स्वभावमा कड्कने सञ्चार तथा सूचना प्रविधि मन्त्री गोकुल बाँस्कोटाले राजिनामा दिएका छन् ।

सेक्युरिटी प्रिन्टिङ प्रेस खरिद सम्बन्धमा ७० करोड रुपैयाँ कमिसनको खेल बाहिरिएपछि मन्त्री बाँस्कोटाको सर्वत्र विरोध भएको छ । संसदको बैठकमा सभामुख अग्निप्रसाद सापकोटाले यसको जानकारी दिएका हुन् ।

आजको प्रतिनिधिसभा बैठकमा सभामुख अग्निप्रसाद सापकोटाले मन्त्री बाँस्कोटाले राजीनामा दिइसकेको अनौपचारिक जानकारी प्राप्त भएको बताएका थिए । यस अघि मन्त्री बाँस्कोटाको राजीनामा माग गर्दै प्रमुख प्रतिपक्ष दल नेपाली कांग्रेसले प्रतिनिधिसभा बैठक अवरुद्ध गरेको थियो ।

उता लेखा समितिमा पनि बाँस्कोटा प्रकरणबारे समिति सदस्यहरुले कडा विरोध गरेका थिए । कांग्रेस लेखा समिति सदस्य मीनेन्द्र रिजालले साइबर क्राइम अन्तर्गत उनलाई थप कारबाही अगाडि बढाउन माग गरे । लेखा समितिले अहिलेका लागि प्रेस खरिद प्रक्रिया नै राेक्न माग गिरएकाे छ ।

सभामुख सापकोटाले शहरी विकासमन्त्रीसमेत रहेका बाँस्कोटाको राजीनामा आइसकेको जानकारी गराउँदै बैठक सञ्चालन गर्न आग्रह गरे पनि कांग्रेसका सांसद आसनबाट उभिइरहेपछि बैठक आजका लागि स्थगन गरिएको छ । प्रतिनिधिसभाको अर्को बैठक यही फागुन १३ गते अपराह्न १ः०० बजे बस्नेछ ।