बाँस्कोटाको राजीनामा स्वीकृत, सञ्चारकाे जिम्मा खतिवडालाई, शहरी विकासमा नेम्बाङ

८ फागुन काठमाडौं । ७० कराेडकाे कमिशनकाण्डमा परेपछि सञ्चार तथा सूचना प्रविधिमन्त्री गोकुल बाँस्कोटाले दिएको राजीनामा स्वीकृत भएसंगै त्यसको जिम्मा अर्थमन्त्री डा युवराज खतिवडा दिइएको छ ।

प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले बाँस्कोटाले दिएको राजीनामा स्वीकृत गरी सञ्चार मन्त्रालयको जिम्मा अर्थमन्त्री डा. युवराज खतिवडाले सम्हाल्ने गरी तोकेकी छन् भने बाँस्कोटाले नै सञ्चारसँगै सम्हाल्दै आएको शहरी विकास मन्त्रालयको जिम्मा भौतिक पूर्वाधारमन्त्री बसन्तकुमार नेम्वाङले सम्हाल्ने गरि जिम्मा दिइएको छ ।

सेक्युरिटी प्रिन्टिङ प्रेस खरिदका विषयमा स्वीस कम्पनीका एजेन्टसँग कमिसनका विषयमा छलफल भएको अडियो सार्वजनिक भएपछि बास्कोटाले बिहीबार नै प्रधानमन्त्रीलाई राजीनामा बुझाएका थिए ।