चैतको तेस्रो साताबाट जनकपुर जयनगर रेल चल्ने

१५ फागुन, काठमाडौं । नेपालमा सञ्चालनका लागी भारतको मद्रासमा निर्माणधीन २ वटा रेल आगामी चैतको तेस्रो साता ‘१८ गते’ नेपाललाई हस्तान्तरण हुने भएको छ । रेल विभागमा महानिर्देशक बलराम मिश्रका अनुसार चैतको १८ गते भारतीय रेल निर्माता कम्पनीले रेल नेपाललाई हस्तान्तरण गर्ने कार्यक्रम तय भएको छ । रेल कुर्था-जनकपुर-जयनगर रुटमा चल्ने निर्माता कम्पनीले जनाएको छ ।

रेल विभागले ८४ करोड ६५ लाख रुपैयाँमा भारतको सरकारी कम्पनी कोकन रेल्वे कर्पोरेसनसँग रेल किन्ने सम्झौता गरेको थियो । पाँच वटा डिब्बासहितकाे यी रेलमा एकैपटक १२ सय यात्रुले यात्रा गर्न सक्छन् । यसअघि नेपालमा कोइलाबाट चल्ने रेल चल्थ्यो । अब भने डिजेल इलेक्ट्रिफाइड मल्टिपल युनिट प्रविधिको रेल चलाउन लागिएको हो । यो रेल डिजेलबाट निस्किने बिजुलीबाट चल्छ ।

यता सरकारले गत वर्षको पुसबाट नै रेल चलाउने घोषणा गरेपनि समयमै चल्न सकेको छैन । अब भने सरकारले आगामी असार अगावै जसरी पनि रेल चलाउने योजना बनाएको छ । यसैबीच जनकपुर-जयनगर रेलमार्गको लिक पनि पूर्ण रुपमा चुस्त अवस्थामा नहुँदा बितेको वर्ष कमला नदीको बाँध फुटेर रेलमार्गमा ठूलो क्षति पुगेपछि रेलमार्ग मर्मतका लागि भारतीय पक्षले काम गरिरहेको छ ।

सरकारले रेल सेवा सञ्चालनका लागि सरकारी स्वामित्वको नेपाल रेल्वे कम्पनीलाई जिम्मा दिएको छ । हाल निष्क्रिय रहेको रेल्वे कम्पनीलाई जनशक्ति थपेर रेल चलाउने सरकारको तयारी हो । यसका लागि करिब २ सय कर्मचारी भर्ति गरिँदैछ ।
यसअघि पनि जनकपुर-जयनगर रेल नेपाल रेल्वे कम्पनीले नै चलाउँथ्यो । नेपालमा सन् १९७२ मा नेपाल रेल्वे कम्पनी स्थापना भएको थियो । सन् २०१४ देखि यो कम्पनी सक्रिय छैन ।

विभागले पहिलो चरणमा २६ जना कर्मचारी मागेर सूचना निकालिसकेको छ । महानिर्देशक मिश्रले दोस्रो चरण्मा पनि थप कर्मचारीका लागि सूचना निकल्न तयारी भइरहेको बताए ।  हाल करिब १५ जना मात्रै कर्मचारी रहेको कम्पनीमा अहिले रेल्वे इन्जिनियरसहित मेकानिकल इन्जिनियर, रेल चलाउने ड्राइभर, स्टेशन म्यानेजर, टिकट काट्ने, र जाँच्ने लगायतको कर्मचारीको दरबन्दी सिर्जना गरिएको छ । अहिले जनकपुरसम्म चल्ने रेल महोत्तरीको विजलपुरासम्म चलाउने योजना रेल्वे विभागको योजना छ ।