अविवाहित मुख्यमन्त्री राईमाथि पत्नी हूँ भन्दै अदालतमा अंशमुद्धा दायर

१६ फागुन, काठमाडौं । अविवाहित रहेका प्रदेश नम्बर १ का मुख्यमन्त्री तथा सत्तारुढ दल नेपाल कम्युनिस्ट पार्टी (नेकपा)का नेता शेरधन राई आफ्नो पति भएकाे दाबी गर्दै एक महिलाले अदालतमा अंश मुद्दा दायर गरेकी छिन् । दोलखा जिल्ला घर भएकी बालिका खड्काले मुख्यमन्त्री राई आफ्नो पति भएको बताउँदै आज शुक्रबार काठमाडौं जिल्ला अदालतमा मुद्दा दायर गरेकी हुन् ।

काठमाडौं जिल्ला अदालतका श्रेस्तेदार आनन्दप्रसाद श्रेष्ठले दिएको जनाकारी अनुसार दिउँसो बालिका खड्का (राई) नाम गरेकी महिलाले मुख्यमन्त्री राईविरुद्ध मुद्दा दायर गरेकी छन् । खड्काले दायर गरेको उजुरीमा राईले आफूसँग विवाह गरेको र पछि घरेलु हिंसा गर्ने गरेको उल्लेख गरेकी छिन् । उनले मुलुकी फौजदारी संहिताको दफा २१५ बमोजिम आफूलाई अंशबण्डा गरिनुपर्ने मागदाबीसमेत गरेकी छिन् ।