सुन्नुस त ! तपाईको फेसबुक अकाउन्ट अरूले खोलिरहेको त छैन ?

१६ फागुन एजेन्सी । फेसबुक, एक निजीरूपमा सञ्चालित सामाजिक सञ्जाल हो । जुन फेसबुक निगमको स्वामित्वमा रहेको छ । प्रयोगकर्ताहरूले एक अर्कासँग साथी बन्न र सन्देश पठाउनको लागि यसको प्रयोग गर्ने गर्दछन् । आफ्नो प्रोफाइल अध्यावधिक गरि साथीहरूलाई आफ्नो बारे जानकारी समेत गराउँदछन् ।

यसका अतिरिक्त प्रयोगकर्ताको शहर, विद्यालय, कलेज या कार्यस्थलको आधारमा बनाइएका सञ्जालमा सामेल हुन पनि सकिन्छ । आफनो फेसबुक प्रयोगकर्ता पृष्ठको ’वाल’ वा ’टाइमलाइन’मा प्रयोगकर्ताले आफनो दैनिकी वा विविध विषय साथीहरू माझ बाँड्न समेत सक्ने सरल माध्यम हो, फेसबुक ।

यदि तपाईले फेसबुक प्रयोग गरिरहनु भएको छ भने तपाईलाई थाहा होला, यसमा बढीमा ५,००० जना साथी आफ्नो खातामा जोड्न सकिन्छ । फेसबुकद्वारा प्रदान गरिएको फेसबुक पृष्ठ नामक विशेष सेवा प्रयोग गरेर चर्चित व्यक्ति, कलाकारहरू आफ्ना प्रशंसकहरूसँग अन्तरक्रिया पनि गर्ने गर्छन् ।

यति मात्रा कहाँ हो र ? फेसबुकमा अहिले एकअर्कासँग सन्देश वार्तालाप, श्रव्यदृश्य वार्तालाप, सामूहिक वार्तालाप र गीत सुन्ने समेत गरिन्छ । तर यो जति सहज र सरल छ तेतिकै मात्रामा दुखद पनि छ । कुरा के छ भने कहिले काँही तपाईले कुनै साइबर क्याफे वा अरू कसैको डीभाइसमा लगइन गरेको आफ्नो फेसबुक अकाउन्ट लगआउट गर्न बिर्सनुभयो भने त्यसको नतिजा नमिठो हुने गर्छ ।

याद राख्नुस, त्यसरी कही खोलिएको तपाईंको फेसबुक अनधिकृत व्यक्तिले चलाउने, दुरूपयोग गरी विभिन्न अनावश्यक पोष्टहरू गर्ने तथा पासवर्ड पत्ता लगाएर ह्याक गर्ने जोखिम पनि हुन्छ । कहिलेकाहीँ तपाईंले लगआउट गर्न भुलेको तपाईंको फेसबुक अकाउन्ट अर्को मान्छेले चुपचाप हेरिरहेको र तपाईंको जासूसी गरिरहेको पनि हुनसक्छ । यस्तो डरबाट मुक्त हुन चाहनुहुन्छ भने तपाईंले फेसबुकमा रहेको एउटा फिचरको सहयोग लिन सक्नुहुन्छ ।

उक्त फिचरको सहयोगले तपाईंले कहाँ–कहाँ आफ्नो फेसबुक लगइन गर्नुभएको छ र कुन डीभाइसमा अहिलेसम्म पनि लगआउट भएको छैन भन्ने थाहा पाउन सक्नुहुन्छ । साथै एक क्लिकमै ती सबै डिभाइसबाट आफ्नो फेसबुक अकाउन्ट लगआउट पनि गर्न सक्नुहुन्छ ।

यसका लागिः माेवाइलमा कसरी ?

– स्मार्टफोनमा रहेको फेसबुक एपमा आफ्नो फेसबुक लगइन गर्नुहोस् र सेटिंग्समा जानुहोस् ।

– त्यहाँ रहेको सेक्युरिटी अप्सनमा जानुहोस् र त्यसभित्र रहेको सेक्युरिटी एण्ड लगइन नामक अप्सनमा ट्याप गर्नुहोस्

– त्यहाँ तपाईंले Where you are logged in नामक खण्ड देख्नुहुनेछ । त्यसमा तपाईंले आफ्नो फेसबुक लगइन भएका सबै डिभाइसको सूची देख्नुहुनेछ ।

– यदि ती डीभाइसमध्ये कुनै डीभाइसमा तपाईंको फेसबुक अहिलेपनि लगआउट भएको छैन अर्थात् एक्टिभ छ भने त्यहाँ रहेका तीनवटा थोप्लाको चिन्हमा ट्याप गरी एक एक गरेर लगआउट गर्न सक्नुहुन्छ ।

– यदि सबै डिभाइसमा एकैचोटी फेसबुक लगआउट गर्न चाहनुहुन्छ भने Log out of all sessions अप्सन छान्न सक्नुहुन्छ ।

डेस्कटपका लागि

· वेब ब्राउजरमा फेसबुक खोलेर आफ्नो अकाउन्टमा लगइन गर्नुहोस्

· टप ब्यानरमा रहेको ड्रपडाउन एरोमा क्लिक गरी Settings अप्सनमा जानुहोस्

· सेटिंग्स पेजभित्र बायाँ भागमा Security and Login अप्सनमा क्लिक गर्नुहोस्

· त्यसपछि Where you are logged in खण्डमा क्लिक गर्नुहोस् जहाँ तपाइँको फेसबुक अकाउन्ट लगइन भएका सबै डिभाइसको सूची देखिन्छ ।

· ती सबै डिभाइसबाट तपाइँले एकएक गरी वा एकैपटक लगआउट गर्न सक्नुहुन्छ ।