अनेरास्ववियुका नेता गौतम र रेग्मीबीच प्रगतिशील विवाह

१६ फागुन काठमाडौं । अनेरास्ववियुका केन्द्रीय सदस्य शेखर गौतमले प्रगतिशील विवाह गर्नुभएको छ । विवाहका नाममा हुने भड्किलो खर्च रोक्दै उनले दाङकी सामना रेग्मीसँग आज नेपाल कम्युनिष्ट पार्टी (नेकपा) कास्कीको कार्यालय शान्तिवनमा विवाह गर्नुभएको हो ।

बेहुला गौतमले लामो समयदेखि राजनीतिबाट सामाजिक रुपान्तरणका लागि लडेका अनुभव सुनाउँदै विवाहलाई भड्किलो नबनाएको बताए । सामनासँग आफ्नो विचार मिलेकाले विवाह सम्भव भएको भन्दै उनले यो प्रगतिशील विवाहलाई जीवनको अनन्तकालसम्म सुन्दर बनाउने प्रतिबद्धता व्यक्त गरे । त्यसैगरी दुलही सामनाले पनि भड्किलो खर्च विवाहमा आवश्यक नरहेको भन्दै शुभेच्छुक बीचको प्रगतिशील विवाह दुवैको रोजाइ भएकाले खुशी रहेको बताएका छन्।

विवाह समारोहमा खेलकूदमन्त्री जगत विश्वकर्माले उनीहरुलाई वैवाहिक जीवनको शुभकामना दिँदै संस्कार र संस्कृतिका नाममा हुने भड्किला गतिविधिलाई सचेत युवाले रोक्न सक्नुपर्ने धारणा राखे । विवाह एकअर्काको साथ र विश्वासले दिगो हुने भएकाले फजुल खर्च विवाहमा आवश्यक नरहेको उनले बताए ।

नेकपा केन्द्रीय सदस्य एवं प्रदेश कमिटीका सचिव गोविन्द नेपालीले गौतम सामना समाजमा उदाहरणीय पात्र भएको भन्दै वैवाहिक जीवनको शुभकामना व्यक्त गरे । गौतमका बुबा रुद्रनाथ गौतमले छोरा–बुहारीको खुशी नै आफ्नो खुशी भएकाले छोराको प्रगतिशील विवाहबाट आफू खुशी रहेको बताउएका छन् ।

सो वैवाहिक समारोहमा अनेरास्ववियुका केन्द्रीय संयोजक ऐनकुमार महर, नेकपा महानगरपालिका अध्यक्ष दीपक पौडेल लगायतले पार्टी नेता तथा कार्यकर्ता आफन्त शुभेच्छुकहरुले नवजोडीलाई वैवाहिक जीवनको शुभकामना दिएका थिए ।