आर्थिक बन्दीका कारण चीनको वायु प्रदूषण आधाले घट्यो

१८ फागुन काठमाडौं । कोरोना भाइरसका कारण चीनमा भइरहेको आर्थिक बन्दीका कारण त्यहाँको वायु प्रदूषण झण्डै आधाले घटेको नासाले जनाएको छ । अमेरिकी अन्तरिक्ष संस्था नासाको स्याटेलाइटबाट खिचिएका तस्बिरहरुले चीनका मुख्य सहरहरुको प्रदूषण घटेको देखाएको हो ।

भाइरस प्रकोपका कारण कारण चीनमा औद्योगिक क्षेत्रहरु र सवारी साधन ठप्प छन् । यातायात र औद्योगिक क्षेत्र ठप्प हुँदा नाइट्रोजन डाइअक्साइडको उत्सर्जनमा कमी आएको हो । नासाको तथ्यांकअनुसार सन् २०२० को जनवरी र फेब्रुररीमा प्रतिवर्गमिटरमा उत्सर्जित नाइट्रोजन डाइअक्साइडको मात्रा शून्यदेखि १ सय २५ मोलिक्युल ‘अणु’ एवं बढीमा २ सय ५० मात्रै छ । तर, सन् २०१९ को यसै अवधिमा उत्सर्जित यसको मात्रा प्रतिवर्गमिटर ५ सय मोलिक्युलसम्म पुगेको थियो ।

‘यति ठूलो मात्रामा प्रदूषणको स्तर घटेको तथ्यांक मैले पहिलो पटक देख्दै छु’, नासाको गोडार्ड अन्तरिक्ष केन्द्रका अनुसन्धानकर्ता फे लिउले भनेका छन् । यसअघि सन् २००८ को बन्दीका वेला प्रदूषणको मात्रामा कमी आएको थियो । तर, त्यसवेला भन्दा अहिले झन् कमी आएको देखिएको हो ।