भगवान पशुपतिनाथकाे नाम लिँदै माेदीले दिए ओलीलाई शुभकामना

१९ फागुन, काठमाडौं । प्रधानमन्त्री केपी ओली दोस्रो पटक मृगौला प्रत्यारोपण गर्न तयार भएसँगै भारतीय समकक्षी नरेन्द्र मोदीले स्वास्थलाभको कामना गरेका छन् । भारतीय प्रधानमन्त्री मोदीले आज बिहान सामाजिक सञ्जाल ट्वीटरमार्फत ओलीलाई स्वास्थलाभको कामना गरेका हुन् ।

ट्वीटमा मोदीले मृगौलाको शल्यक्रियामा सफलता मिलोस् भन्दै शीघ्र स्वास्थलाभको कामनासमेत गरेका हुन् । उनले ट्वीटरमा लेखेका छन् – मेरा प्यारा मित्र के पी शर्मा आलीजी ! तपाईंले गर्न लाग्नुभएको शल्यक्रिया सफल होस् र शीघ्र स्वास्थलाभ प्राप्त होस् । भगवान पशुपतिनाथबाट सदासर्वदा तपाईंको सुस्वास्थ, खुशी र दीर्घजीवनको आशीर्वाद प्राप्त होस् । साथै भारत नेपाल सम्बन्धलाई नयाँ उँचाईमा पुर्याउनका लागि तपाईंको योगदान निरन्तर रहोस् ।

प्रधानमन्त्री ओली मृगौला प्रत्यारोपणका लागि आज साँझ अस्पताल भर्ना हुँदैछन् । उनको पर्सि बुधबार शल्यक्रिया गर्ने कार्यक्रम रहेको छ ।