ओलीको शल्यक्रिया गर्न भारतबाट दुई चिकित्सक आउँदै

१९ फाल्गुण, काठमाडौं । प्रधानमन्त्री केपी शर्मा ओलीको दोस्रो पटक मृगौला प्रत्यारोपण गर्न भारतबाट समेत दुईजना वरिष्ठ शल्य चिकित्सक बोलाइने भएको छ ।

त्रिभुवन विश्वविद्यालय शिक्षण अस्पताल महाराजगञ्जमा गरिने शल्यक्रियामा नेपाली चिकित्सक नै मुख्य रहने बताइएपनि अन्ततः भारतबाट समेत डाक्टर बोलाइन लागेको हो । शिक्षण अस्पतालका प्रा. डा. प्रेम ज्ञवाली नेतृत्वको टोलीले नै शल्यक्रिया गर्ने भएपनि ब्याकअपका लागि भारतबाट दुईजना वरिष्ठ चिकित्सक बोलाइएको हो । ती यसअघि एपोलो अस्पतालमा ओलीको मृगौला प्रत्यारोपण गर्ने डाक्टरहरु नै रहेको बताइएको छ ।

पर्सि बुधबार गरिने शल्यक्रियाका लागि तयारी भन्दै प्रधानमन्त्री ओली आजबाटै अस्पताल भर्ना हुँदैछन् । नातामा भाञ्जी पर्ने ३२ बर्षीया महिलाले ओलीलाई मृगौला दान गर्ने भएकी छन् ।

अपरान्ह मन्त्रिपरिषद बैठक सकेर प्रधानमन्त्री ओली साँझ त्रिवि अस्पताल महाराजगञ्ज भर्ना हुँदैछन् । भारतबाट आउने चिकित्सकको नाम नखुलाइए पनि अस्पतालले विशेषज्ञ चिकित्सक नै आउने जानकारी दिएको छ ।