आठ हजार बढी छाउगोठ नष्ट

२१ फाल्गुण, काठमाडौं । सरकारले छाउपडी उन्मूलनका लागि आठ हजारभन्दा बढी छाउगोठ भत्काएको छ । छाउप्रथाको नाममा कर्णाली तथा सुदूरपश्चिम क्षेत्रका महिलाले कष्टकर जीवन र विभेद भोगेपछि सरकारले पुस ९ गते छाउगोठ भत्काउने निर्णय गरेअनुसार हालसम्म आठ हजार ६ सय १७ छाउगोठ भत्काइएको हो ।

प्रहरी प्रधान कार्यालयका अनुसार फागुन १५ गतेसम्म सुदूरपश्चिम प्रदेशमा छ हजार ३ सय ८२ र कर्णाली प्रदेशमा दुई हजार २ सय ३५ छाउगोठ भत्काइएको छ । हालसम्म सबैभन्दा धेरै अछाम ल्लामा चार हजार ८ सय ९७ र सुर्खेतमा एक हजार ९ सय २४ छाउगोठ भत्काइएको प्रहरी प्रवक्ता शैलेश थापा क्षेत्रीले जानकारी दिए ।

यस्तै बाजुरामा ५ सय १०, डोटीमा ३ सय ४२, कैलालीमा २ सय ७३, दैलेखमा २ सय ५९, कञ्चनपुरमा १ सय ९७, बझाङमा १ सय ४०, जाजरकोटमा ३०, कालिकोटमा २०, डडेल्धुरामा २३ र सल्यानमा दुई छाउगोठ भत्काइएको छ ।

यसैगरी कर्णाली र सुदूरपश्चिमका ९ सय ६५ घरपरिवारलाई छाउपडीसम्बन्धी सचेतनामूलक कार्यक्रम सञ्चालन गरिएको छ । यसमा कर्णाली प्रदेशमा ४ सय ९९ र सुदूरपश्चिम प्रदेशमा ४ सय ६६ घरपरिवार रहेका छन् । सरकारले छाउगोठसम्बन्धी जनचेतना फैलाउन रु एक करोड विनियोजनसमेत गरेको थियो । यस्तै सरकारले छाउगोठ राख्ने व्यक्तिलाई सरकारले दिने सेवासुविधामा समेत रोक लगाउने निर्णय गरेको थियो ।