कम्रेडको जन्मदिनमा क्वात्राको शुभकामना

२३ फाल्गुण, काठमाडौं । सत्तारुढ नेपाल कम्युनिष्ट पार्टीका नेता एवं पूर्वप्रधानमन्त्री माधवकुमार नेपाल आज बिहानैदेखि व्यस्त थिए । तारन्तर फोन आइरहन्थ्यो । सबैलाई उनी धन्यवाद भन्दै थिए ।

यही श्रृंखलालाई जोड्दै एउटा फोन आयो विशेष खाले । फोन गर्नेले भन्यो – आपकी शुभजन्म दिवस में ढेर सारी शुभकामनाएँ । नेता नेपालले धन्यवाद फर्काउन नपाउँदै उताबाटै भनियो – आपको शुभकामना देने के लिए महामहिम क्वात्राजी पधार रहें हैं, आपकी निवास में ।

त्यसपछि नेता नेपालको घरमा अर्कै माहोल छायो । हिजो मात्र राष्ट्रपति विद्यादेवी भण्डारी समक्ष ओहदाको प्रमाणपत्र बुझाएका नेपालका लागि भारतीय राजदूत विनयमोहन क्वात्रा एकाबिहानै नेता नेपाललाई भेट्न कोटेश्वरस्थित घरै पुगे । निहुँ थियो – नेता नेपालको जन्मदिन । यसअघि सामान्य रुपमा मनाइने उनको जन्मदिन यसपाला भने विशेष नै बन्यो । नेपाल आउने वित्तिकै भारतीय राजदूतले उनलाई बिशेष महत्व दिएर भेट्नु अनौठो संयोग मात्र थिएन एउटा गतिलो सन्देश पनि थियो ।

क्वात्राको यो शैलीले भारतीय शासकको सोच र कार्यदिशासमेत थोर बहुत प्रष्ट बनाईदिएको छ । नेपालको आन्तरिक राजनीतिमा विशेष दख्खल दिने आरोपबाट भारत मुक्त भएको छैन । पछिल्लो राजनीतिक गतिविधिप्रति भारतको खास रुची रहेको छ । अर्थात नेपाल कम्युनिष्ट पार्टीभित्रको राजनीतिक खिचातानीमा नेता नेपाल र प्रधानमन्त्री केपी ओलीको अलग अलग कित्ता रहेको छ । यो कुरामो राम्रो ज्ञान भएको भारतीय राजदूतावासले आफ्नो रुची परोक्ष रुपमा प्रकट गरिदिएको छ ।

सरकारी पदाधिकारीलाई नभेटी नेता नेपाललाई भेट्न उनको घर नै पुगेका क्वात्राले भारतीय सरकारको प्राथमिकता र चाहना घुमाउरो पाराले स्पष्ट गरिदिएका छन् । परराष्ट्र मन्त्रालयसँग यसबारे कुनै जानकारी छैन । कूटनीतिक नियोग वा राजदूतले कसैलाई भेट्नु पर्दा परराष्ट्र मन्त्रालयको अनुमति लिनुपर्ने नियम सामान्यतः सबैतिर रहेको हुन्छ । क्वात्रालाई यो जानकारी नभएको होइन । तरपनि उनी नेता नेपाललाई भेट्न उनको घरै पुगेका छन् ।

क्वात्रासँगको भेटबाट नेता नेपाल पनि हौसिएका हुन सक्छन् । किनभने आन्तरिक राजनीतिमा उनी प्रधानमन्त्री ओलीका बलिया प्रतिस्पर्धी हुन् । ओलीराजमा उनी न त सरकारमा बलिया छन् न पार्टी पंक्तिमा नै । साथै ओलीलाई पदमुक्त गर्नसक्ने ल्याकत उनको देखिंदैन । त्यसैले नेपथ्यमा बसेर पूर्वमाओवादी नेता पुष्पकमल दाहालको काँधमा बन्दूक राखेर फायरिङ गरिरहेका छन् ।

भारतीय पक्षको साथ र समर्थन प्राप्त भएको अवस्थामा आफू बलियो हुने उनको बुझाई रहेको देखिन्छ । तर क्वात्रासँगको उनको भेटलाई सरकारी पक्षले कसरी लिन्छ त्यो भने अहिले नै प्रष्ट छैन । दोस्रोपटक मृगौला प्रत्यारोपण गरेर अस्पतालमा आराम गरिरहेका प्रधानमन्त्री ओलीले यो भेटलाई कसरी लिएका छन्, त्यो पनि आउने दिनमा स्पष्ट होला नै । तर हाललाई भने भारतीय पक्षले नेपालमार्फत आफ्नो उद्येश्य र चाहना पूर्ति गर्ने सन्देश भने दिन खोजेको बुझियो ।