कोरोनाका कारण इरानमा थप १७ को मृत्यु, विश्वभर एक लाख सङ्क्रमित

२४ फागुन एजेन्सी । कोरोना भाइरसको सङ्क्रमण तीब्र फैलिएको इरानमा शुक्रबार थप १७ जनाको मृत्यु भएको छ । योसँगै इरानमा कोरोनाभाइरस सङ्क्रमणका कारण मृत्यु हुनेको सङ्ख्या १२४ पुगेको इरानी अधिकारीले बताएका छन् ।

चिनियाँ समाचार संस्था सिन्ह्वाले जोन हकिन्स विश्वविद्यालयलाई उद्धृत गदै संसारभर कोरोना भाइरसबाट सङ्क्रमितको सङ्ख्या शुक्रबार एक लाख नाघेको जनाएको छ । स्थानीय समय अनुसार शुक्रबार बिहान आठ बजेसम्म कूल एक लाख ११३ जनामा कोरोनाभाइरसको पुष्टि भएको विश्वविद्यालयकोे तथ्याङ्कमा उल्लेख छ ।

“पछिल्ला केही दिनमा देशभरिमा कोरोना भाइरसबाट सङ्क्रमितको थप सङ्ख्या एक हजार २३४ रहेको छ,” स्वास्थ्यमन्त्री किअनोस जाहनपोरले भने । उनका अनुसार सङ्क्रमितको कूल सङ्ख्या ४७४७ पुगेको छ । उनले भने, “सङ्क्रमित भएको पुष्टि भएका यी विरामीहरू सम्भवतः दुई हप्ता अगाडि नै सङ्क्रमित भएका र हाल उपचारका लागि अस्पताल आउँदा उनीहरूमा सङ्क्रमण पुष्टि भएको हो ।”

इरानमा कोरोना भाइरसबाट सङ्क्रमित भएको आशङ्कामा १५ हजार ९८० व्यक्तिको स्वास्थ्य परीक्षण गरिएको थियो । कोरोना भाइरस सङ्क्रमित भएपछि निको भएका व्यक्तिहरूको सङ्ख्या भने ९१३ भन्दा बढी पुगेको छ ।

अधिकारीहरूका अनुसार सङ्क्रमितमध्ये सबैभन्दा धेरै राजधानी तेहरानमा रहेका छन् । त्यसैले तेहरानलाई इरानमा कोरोना भाइरसको केन्द्र मानिएको छ । यसैबीच स्पेनमा थप पाँच जनालाई कोरोना भाइरसको सङ्क्रमण पुष्टि भएको छ । योसँगै यहाँ कोरोनाभाइरसबाट सङ्क्रमितको सङ्ख्या ३६५ पुगेको स्वास्थ्य अधिकारीहरूले शुक्रबार जानकारी दिएका छन् ।

यसअघि बिहीबारसम्म एकैदिन १०२ जनाको समूहलाई सङ्क्रमण भएको पुष्टि गरिएको थियो । त्यस्तै यूरोपेले अर्को मुलुक नेदरल्याण्डमा पनि कोरोना भाइरसबाट सङ्क्रमित पहिलो विरामी भेटिएका छन् । स्वास्थ्य अधिकारीहरूले ८६ वर्षीय एक वृद्धमा कोरोना भाइरसको पुष्टि भएको जानकारी दिएका छन् ।