ओलीको डिस्चार्ज यही साता

२६ फाल्गुण, काठमाडौं । प्रधानमन्त्री केपी ओलीको स्वास्थ्यमा तीव्र सुधार भईरहेकोले उनलाई छिट्टै डिस्चार्ज हुन चाहेपनि चिकित्सकले संभावित संक्रमणको त्रासले तत्काल सम्भव नहुने बताएका छन् ।

हिजो आइतबार प्रधानमन्त्री ओलीले राम्रैसँग खाना खाएको र फिजियोथेरापी पनि सहजरुपमा गर्नु भएकाले डिस्चार्ज गर्न दवाव दिइएको हो । प्रधानमन्त्री ओलीले नै डाक्टरहरुलाई अब आफू सरकारी निवास बालुवाटारमै बसेर आराम गर्न चाहेको बताएको स्रोतको भनाई छ ।

तर चिकित्सकहरु भने तत्कालै यस्तो निर्णय लिन गाह्रो हुने पक्षमा छन् । प्रधानमन्त्री निकट स्रोतका अनुसार, चिकित्सकहरुले संभावित संक्रमणबाट जोगिन अरु केही दिन अस्पतालमै बस्दा राम्रो हु्ने सुझाव दिएका छन् ।

तर प्रधानमन्त्रीले धेरै कर गर्नु भयो र स्वास्थ्यले साथ दियो भने यो हप्ताको अन्त्यसम्म डिस्चार्ज गर्न सकिने डाक्टरहरुको भनाई रहेको पनि स्रोतले बतायो । प्रधानमन्त्री ओलीसँगै भाञ्जी समीक्षा संग्रौलालाई समेत डिस्चार्ज गरिने बताइएको छ ।