प्रधानमन्त्रीले आफैंले दाह्री काटेपछि !!

२८ फागुन काठमाडौं । प्रधानमन्त्री केपी शर्मा ओलीको स्वास्थ्य अवस्था क्रमिकरुपमा सुधार हुँदै आएको छ । मिर्गौला प्रत्यारोपणपछि अस्पतालमै स्वास्थ्यलाभ गरिरहेका प्रधानमन्त्री ओलीको स्वास्थ्य अवस्थामा सुधार हुँदै आएको प्रधानमन्त्रीका प्रेस सल्लाहकार सूर्य थापाले बताए ।

बुधबार बिहान सामाजिक सञ्जाल ट्विटरमा लेख्दै सल्लाहकार थापाले प्रधानमन्त्री ओलीको स्वस्थ्य बन्ने क्रम रफ्तारमा चलिरहेको र प्रधानमन्त्रीले आफैंले दाह्री काटेको उल्लेख गरेका छन् ।

प्रधानमन्त्रीको स्वास्थ्यलाभ अपेक्षित गतिमा भइरहेको जनाउँदै थापाले प्रधानमन्त्रीले हिँडडुल र नियमित व्यायाम जारी राखेको बताए । गएको फागुन २१ गते बुधबार त्रि.वि. शिक्षण अस्पताल, महाराजगञ्जमा प्रधानमन्त्री ओलीकाे दोस्रो पटक मिर्गौला प्रत्यारोपण गरिएको थियो ।

यसैबीच, प्रधानमन्त्रीका प्रेस सल्लाकार सुर्य थापाले स्रोतको हवाला दिएर १०१ प्रतिशत झूठ र भ्रमको खेती नगर्न सबैमा अनुरोध गरेका छन् । उनले केही बेरअघि ट्विटरमा लेख्दै प्रधानमन्त्रीज्यूको स्वास्थ्य अवस्था अपेक्षित रूपमा नै सुधारको क्रममा रहेको बताउदै झूठ र भ्रमको खेती नगर्न सबैमा अनुरोध गरेका हुन् ।