टुटल र पठाओको सेवामा फेरि प्रतिबन्ध !

२८ फागुन, काठमाडौं । निजी प्रयोजनका लागि दर्ता भएका सवारी साधन भाडामा प्रयोग गर्न नपाइने भन्दै यातायात व्यवस्था विभागले हिजो साँझ सार्वजनिक सूचना निकालेपछि मोबाइल एपमार्फत् बुकिङ गरेर मोटरसाइकलमा यात्रु बोक्ने टुटल र पठाओ सेवामा प्रतिबन्ध लाग्ने भएको छ ।

विभागले विभिन्न प्रयोजनमा दर्ता भएका निजी सवारीलाई सार्वजनिक सवारीको रूपमा प्रयोग नगर्न चेतावनी दिएको हो ।ट्याक्सी व्यवसायी तथा चालकले मंगलबार दिउँसो टुटल र पठाओलाई कानून विपरित सेवा प्रदान गर्न छुट दिइएको भन्दै विभाग घेराउ गरेका थिए । ट्याक्सी चालकहरुको दवावमा विभागले मंगलबार राती नै सूचना जारी गरेको हो ।

विभागको सूचनामा कानूनको उल्लंघन गरी अरू प्रयोजनमा दर्ता भएका सवारी साधनले भाडामा यात्रु बोकेमा प्रचलित कानून बमोजिम कारवाही गर्ने जानकारी दिएसंगै यसको पक्ष तथा विपक्षमा टिका टिप्पणी हुन थालेको छ ।काठमाडौंबासीहरु बीच लोकप्रिय रहेको टुटल र पठाओ सेवाले हजारौंलाई रोजगारी समेत प्रदान गरेको छ । ट्याक्सी चालकहरुको ठगी र बद्मासीबिरुद्ध आजित भएका उपभोक्ता विश्वभर मै लोकप्रिय रहेको यस्तो सेवा नेपालका लागि भने नयाँ हो ।

सरकारले एघार महिनाअघि पनि यस्तै निर्णय गर्दा जनस्तरबाट सामाजिक सञ्जालमार्फत त्यसको धेरै आलोचना भएको थियो । त्यसपछि प्रधानमन्त्री केपी शर्मा ओलीले उक्त निर्णय कार्यान्वयन नगर्न निर्देशन दिएका थिए । तर ११ महिनापश्चात् पुनः यातायात व्यवस्था विभागले सूचना निकालेर एउटा प्रयोजनका लागि दर्ता भएको सवारीसाधन अर्को प्रयोजनमा प्रयोग भए कानुन अनुसार कारबाही गरिने जनाएसंगै टुटल र पठाओ प्रयोग गर्ने अधिकांशले यो सेवा निरन्तर संचालन हुनुपर्ने अडान राखेका छन् ।

टुटल र पठाओको नाममा उल्लेख नगरी जारी भएको सूचना कार्यान्वयन गरिएमा निजी सवारीलाई पनि भाडा लिएर यात्रु बोकिरहेका टुटल, पठाओलगायतका मोटरसाइकलमा यात्रु बोक्ने सेवा प्रभावित हुनेछन् । टुटल तथा पठाओका सञ्चालकहरुले सरकारले विभिन्न प्रयोजनमा दर्ता भएका सवारीलाई सार्वजनिक सवारीको रूपमा प्रयोग नगर्न जारी गरेको सुचना व्यावहारिक र समयसापेक्ष नभएको बताएका छन् ।

पछिल्लो समय धेरैले ट्याक्सीको सट्टा टुटल, पठाओजस्ता सेवा प्रयोग गर्दै आइरहेका छन् । सजिलो,सस्तो र छिटो माध्यम नै टुटल, पठाओ सबैको रोजाइ बनेको छ । त्यसैले नेपालमा अहिले अधिकांश व्यक्तिहरू टुटल, पठाओजस्ता सेवाप्रदायकसँग आबद्ध रहेका छन् र उनीहरूमार्फत् धेरै यात्रुले आनन्दको सेवा लिइरहेका छन् ।