प्रधानमन्त्रीका प्रेस सल्लाहकार भन्छन्, दुई जनाबाहेक अरुलाई भेट्न दिइएन

३० फागुन, काठमाडौं । मृर्गौला प्रत्यारोपणको दशाैं दिन प्रधानमन्त्री केपी शर्मा ओलीको स्वास्थ्यस्थिति सामान्य रहेको त्रिवि शिक्षण अस्पतालले जनाएको छ ।

बिहीवार अस्पतालका कार्यकारी निर्देशक प्राध्यापक डाक्टर प्रेमकृष्ण खड्गाले प्रधानमन्त्री ओलीको स्वास्थ्यस्थिति सामान्य रहेको बताए । प्रत्यारोपणपछि गरिने परीक्षणहरूलाई निरन्तरता दिइएको र उनकाे भाइटल तथा ल्याब सूचकहरू सामान्य रहेको बताए ।

प्रधानमन्त्री ओलीले नियमित खाना खाइरहेको खड्गाले बताए। प्रधानमन्त्री ओलीको पिसाबमा संक्रमणको आशंका देखिएपछि बुधवार परीक्षण गरिएको थियो । सोही कारणले उहाको डिस्चार्ज ढिला गरिएको अस्पताल स्रोतले बताएको थियो ।

परीक्षणमा कुनै खराबी नदेखिएपछि अहिले नै डिस्चार्ज गर्ने अवस्था नरहेको डा खड्गाले बताए । त्यस्तै प्रधानमन्त्रीका प्रेस सल्लाहकार सुर्य थापाले अहिलेसम्म ओलीलाई चिकित्सक बाहेक किड्नी दान गर्ने उनकी भान्जी समीक्षा संग्रौला र प्रधानमन्त्री पत्नी राधिका शाक्य गरी दुईजनाले मात्र भेटेको जानकारी दिए । केहि दिन अघि शिक्षण अस्पतालमा प्रधानमन्त्री ओलीको पुन मृगौला प्रत्यारोपण गरिएको थियो ।