क्यानडाका प्रधानमन्त्री पत्नीलाई कोरोना संक्रमण, जस्टिन क्वारेन्टाइनमा

३० फागुन, एजेन्सी । क्यानडाका प्रधानमन्त्री जस्टिन ट्रुडोकी पत्नी सोफी ग्रेगोरी ट्रुडोलाई कोरोना भाइरस ‘कोभिड–१९’ को संक्रमण देखिएको छ । बिहीबार राति क्यानडेली प्रधानमन्त्रीको कार्यालयले सोफीलाई कोभिड–१९ को संक्रमण भएको पुष्टि गरेको हो ।

सोफीको स्वास्थ्य अवस्था ठीक रहेको र चिकित्सकको सल्लाहमा आइसोलेसनमा रहेको पनि क्यानडेली सञ्चारमाध्यमले जनाएका छन् । त्यस्तै प्रधानमन्त्री जस्टिन ट्रुडो पनि १४ दिन आइसोलेसनमा बस्ने भएका छन् । कुनै लक्षण नदेखिएकाले उनले भने कोभिड–१९ को परीक्षण गर्नु नपर्ने चिकित्सकले बताएका छन् ।

प्रधानमन्त्री ट्रुडोले शुक्रबार देशवासीका नाममा सम्बोधन गर्दैछन् ।बिहीबार बेलायतबाट फर्केपछि सोफीलाई ज्वरो आउन थालेको थियो । क्यानडामा अहिलेसम्म एक जनाको मृत्यु भएको छ भने १३२ जनामा संक्रमण देखिएको छ । गत डिसेम्बरमा चीनको वुहानबाट सुरु भएको कोभिड–१९ को संक्रमण अहिले विश्वका १२५ देशमा फैलिइसकेको छ ।

शुक्रबार बिहानसम्म कोभिड–१९ को संक्रमणबाट ४ हजार ९ सय ७९ जनाको मृत्यु भएको छ भने एक लाख ३४ हजारभन्दा बढी संक्रमित भएका छन् । ७० हजारभन्दा बढी निको भइसकेका छन् । पछिल्लो समय चीनमा कोभिड–१९ को प्रकोप घट्दै गए पनि युरोपेली र अमेरिकी मुलुकमा भने बढिरहेको छ ।