बजार जान्छु भन्दै घरबाट हिँडेका वृद्ध मृतावस्थामा फेला

३० फागुन, काठमाडौं । डोटी शिखर नगरपालिकामा पर्ने डा केआइसिंह राजमार्गको गेरुपानीको सडकमा एकजना वृद्ध मृतावस्थामा फेला परेका छन् ।

जिल्ला प्रहरी कार्यालयका प्रहरी प्रमुख तथा प्रहरी उपरीक्षक दिलीपसिंह देउवाले दिएको जानकारीअनुसार वडा नं २ कठालीगाउँका अन्दाजी ६६ वर्षीय अनिल मल्ल डडेल्धुरा दिपायल जोड्ने डा केआइसिंह राजमार्गको गेरुपानी सडकको नालीमा मृतावस्थामा फेला परेका हुन् ।

मृतावस्थामा फेला परेका मल्लको टाउकोमा चोट लागेको इलाका प्रहरी कार्यालय दिपायलले जनाएको छ । टाउकोमा चोट लागेका कारण मृतकका आफन्तले हत्या भएको हुनसक्ने आशङ्का गरेका छन् । शव परीक्षणका लागि जिल्ला अस्पताल लगिएको र घटनाबारे आवश्यक अनुसन्धान भइरहेको जिल्ला प्रहरी कार्यालयले जनाएको छ । मल्ल डोटीको प्रमुख व्यापारी केन्द्र पिपल्ला बजार जान्छु भन्दै घरबाट हिँडेकाे उनका आफन्तले जनाएका छन् ।