प्रम ओली बालुवाटार फकर्दै, कस्ताे छ स्वास्थ्य अवस्था ?

३० फागुन, काठमाडौं । प्रधानमन्त्री केपी शर्मा ओली मिर्गौला प्रत्यारोपणपछि महाराजगञ्जस्थित त्रिभुवन विश्वविद्यालय शिक्षण अस्पतालबाट आज साँझ प्रधानमन्त्री निवास फिर्ता हुने भएका छन् ।

अस्पतालका कार्यकारी निर्देशक प्रा डा प्रेमकृष्ण खड्गाले आज पत्रकार सम्मेलन गरी उनको स्वास्थ्यावस्था राम्रो रहेकाले निवास फिर्ता गर्न लागिएको जानकारी दिए । ‘‘प्रधानमन्त्रीलाई उहाँको पूर्ण स्वास्थ्यलाभपछि आज साँझ अस्पतालबाट डिस्चार्ज गरिने भएको छ’’, उनले भने । यसअघि मिर्गौलादाता प्रधानमन्त्री ओलीकी भाञ्जी समीक्षा सङ्ग्रौला भने स्वास्थ्यलाभ गरी बुधबार घर फर्किसकेकी छन् ।

प्रधानमन्त्री ओली शारीरिक रुपमा अशक्त छन्, तर उनी दुनियाँलाई तगडा रहेको सन्देश दिन चाहन्छन् । दोस्रो पटक मृगौलाको प्रत्यारोपण गराएका ओली लामो समय अस्पताल बस्दा आफ्नो स्वास्थ्यबारे चल्न सक्ने हल्ला र त्यसको प्रतिकार गर्न लाग्ने समय खेर फाल्न चाहन्नन् ।

मृगौला प्रत्यारोपण गर्न अस्पताल भर्ना हुनु अगाडि नै उनले चिकित्सकसँग छलफल गरेका थिए । सबै चिकित्सकले बढीमा एक हप्ताभित्र तपाई पूर्ववत काममा फर्कन सक्नुहुन्छ भनेर आश्वस्त गराएका थिए । त्यसैले ओली अस्पताल भर्ना भएको एकसाता पुग्दै गर्दा डिस्चार्ज हुन चाहन्थे । उनले चिकित्सकहरुलाई पूर्ववाचा पटकपटक सम्झाए । त्यसैले गत बुधवार नै अर्थात हप्ता दिनभित्रै उनलाई डिस्चार्ज गर्न चिकित्सक तयार थिए । किनभने ओलीको स्वास्थ्यमा अपेक्षा गरे बमोजिमकै सुधार भएको थियो । तर ओलीकी श्रीमती राधिका शाक्य र निजी चिकित्सक डा. दिव्या सिंह शाह भने संभावित संक्रमणको त्रासले गर्दा डिस्चार्ज गर्न तयार भएनन् ।

जसले गर्दा ओलीको अस्पताल बसाई केही लम्बियो । तर ओलीको जिद्दीले आज काम गर्यो । अर्थात आज ओली अस्पतालबाट सरकारी निवास स्थानान्तरण हुँदैछन् । बाहिर भन्दा ओली अस्पतालबाट डिस्चार्ज भनिएपनि उनको स्वास्थ्य भने श्रीमती र निजी चिकित्सक डा. शाहले भने जस्तै तन्दुरुस्त छैन । त्यसैले प्रधानमन्त्रीको सरकारी निवासमा अब अस्पतालकै जस्तो सेवा सुविधा उपलव्ध हुने गरी व्यवस्था मिलाइएको छ ।

तर प्रधानमन्त्रीको स्वास्थ्य अवस्था भने अझैपनि धेरै संवेदनशील रहेको अस्पताल स्रोतको भनाई छ । अब हाम्रो ड्युटी अस्पतालमा कम बालुवाटारमा बढी हुने भो – एकजना डाक्टरले नेपालबहस डटकमलाई भने । अब संस्थागत रुपमै ओलीले बेडबाटै शासन सत्ता चलाउने भए – उनले भने ।

हुनपनि प्रधानमन्त्री ओलीका निजी चिकित्सक डा. शाहले अस्ती मात्रै पत्रकार सम्मलेन गरी सामान्य जीवनयापन गर्न छ महिनादेखि एकवर्ष लाग्ने स्वीकार गरेकी थिइन् । प्रधानमन्त्री ओली यही फागुन १९ गते मिर्गौला प्रत्यारोपण गर्नका लागि अस्पतालमा भर्ना भएका थिए । उनको फागुन २१ गते मिर्गौला प्रत्यारोपण गरिएको थियो ।