एसईई परीक्षार्थीहरुलाई मास्क, सेनिटरी प्याड र कलमको व्यवस्था

मिना कंडेल

२ चैत, नवलपुर । चैत ६ गतेबाट शुरु हुने प्रवेशिका परीक्षा एसईई परीक्षामा सहभागी हुने पूर्वी नवलपरासीका परीक्षार्थीहरुलाई मास्क ,सेनिटरी प्याड र कलम प्रदान गरिने भएको छ । परीक्षामा सहभागी परीक्षार्थीहरुलाई परीक्षाका बेला कुनै समस्या नहोस भनेर मास्क, प्याड र कलम को ब्यवस्था गर्न लागिएको शिक्षा तथा समन्वय इकाई नवलपुरका प्रमुख कृष्णचन्द्र पोख्रेलले बताए ।

कोरोना भाइरस (कोभिड–१९) को संक्रमण बाट बच्नका लागि रुघाखोकी लागेका विद्यार्थीलाई मास्क प्रदान गरिने , महिनावारी भएका छात्रालाई निःशुल्क प्याड र लेख्दालेख्दै कलमको मसी सकिएमा वा बिग्रिएमा कलम उपलब्ध गराउने व्यवस्था गरिँदैछ ।

रोटरी क्लब कावासोतीले २० हजार रुपियाँ बराबरको मास्क , जागृति बाल तथा युवा सरोकार नेपालले ४० हजार रुपियाँ बराबरको महिनावारी प्याड त्यस्तै पुस्तक तथा स्टेसनरी महासंघ नवलपुरले १५ हजार रुपियाँ बराबरको कलम र रोटरी क्लब कावासोतीले २० हजार रुपियाँ बराबरको मास्क उपलब्ध गराएको छ। कुल परीक्षार्थीको ३८ प्रतिशतलाई पुग्ने गरी कलम र आठ प्रतिशतलाई पुग्ने गरी मास्कको व्यवस्था गरिएको एकाइ प्रमुख पोखरेलले जानकारी दिए ।

चैत ६ गतेबाट सञ्चालन हुने यस वर्षको एसईई परीक्षामा नवलपुर केन्द्रमा २५ परीक्षा केन्द्र कायम गरिएको छ । उत्तिनै संख्यामा केन्द्राध्यक्ष, ४४ जना सहायक केन्द्राध्यक्ष, ३३० जना परीक्षा सहायक, ६६ जना कार्यालय सहयोगी १३३ र सुरक्षाकर्मी २५० जना परिचालित गरिने भएको छ । नियमिततर्फका छ हजार ४६५ र एक्जाम्टेडतर्फका ११० गरी कुल छ हजार ५७५ जना परीक्षार्थी रहनेछन् । तीमध्ये छात्रा तीन हजार ३३६ रहेका छन् ।