पीपीईको उत्पादन ४० प्रतिशतले वृद्धि गर्न डब्लुएचओको माग

संक्रमणको कारण त्रासको अवस्था सिर्जना, रुघा खोकी लाग्दा पनि कोरोना नै हो कि भन्ने डर ?

३ चैत, एजेन्सी । विश्वव्यापी महामारीको रुप लिएको कोरोना भाइरस संक्रमणको कारण त्रासको अवस्था सिर्जना भएको छ । सामान्य रुघा खोकी लाग्दा पनि कोरोना नै हो कि भन्ने डर मानिसमा देखिएको छ ।

कोरोना भाइरसको संक्रमणका केही विशेष लक्षणहरु छन्ः

ज्वरो आउनु र थकान महसुस हुनु

लगातार खोकी लाग्नु

स्वास प्रस्वासमा समस्या हुनु

यी लक्षण देखिएमा स्वास्थ्यकर्मीसँग परामर्श लिने र कम्तिमा सात दिन घरमै बस्नु पर्ने स्वास्थ्यकर्मीले बताएका छन् । विशेष गरी लगातार खोकी लाग्ने र उच्च ज्वरो आएमा सतर्कता अपनाउनु पर्ने हुन्छ । विश्वभर अहिलेसम्म कोरोना भाइरसको संक्रमणबाट ६ हजार भन्दा धेरै मानिसको मृत्यु भएको छ भने १ लाख ६२ हजार भन्दा धेरै संक्रमित छन्।

यसैबीच, कोरोना भाइरसको संक्रमण फैलिन नदिनका लागि अत्यावश्यक पर्सनल प्रोटेक्टिभ इकुप्मेन्ट ‘पीपीई’को उत्पादन ४० प्रतिशतले वृद्धि गर्न विश्व स्वास्थ्य संगठन ‘डब्लुएचओ’ले माग गरेको छ ।

उत्पादन कम्पनी तथा सरकारहरुले पीपीई सामग्रीको उत्पान तत्काल ४० प्रतिशतले बढाउन सके मात्रै मागलाई धान्न सकिने डब्लुएचओले जनाएको छ । कोरोना भाइरसको संक्रमण फैलिँदै गएकाले माग बढेको तथा मानिसहरुले आवश्यकता भन्दा बढी सामग्री किन्न थालेका कारण मास्कसहितका पिपिई सामग्रीको अभाव विश्वव्यापी बनेको छ ।

पिपिई सामग्रीको अभाव, आवश्यकता भन्दा बढी किन्ने बानी तथा दुरुपयोगका कारण कोरोनासँगै अरु संक्रामक रोगहरु फैलिने जोखिम बढेको डब्लुएचओले जनाएको छ । पिपिई सामग्रीको अभावका कारण स्वास्थ्यकर्मीहरु जोखिम तानिने र त्यसले गर्दा संक्रमण थप भयावह बन्ने भएकाले तत्काल उत्पादन वृद्धि गर्नु पर्ने माग गरिएको हो ।

ग्लोब्स, मेडिकल माक्स, रेस्पिरेटर्स, गगल्स, गाउन, एप्रोनसहितका सामग्रीको अभावका कारण डाक्टर, नर्स, स्वास्थ्य अधिकारी तथा उनीहरुको सेवा प्रभावित भएको छ । कोरोना भाइरसको संक्रमण फैलिएपछि सर्जिकल माक्सको मूल्य ६ गुणा तथा एन ९५ रेस्पिरेटरको मूल्य तीन गुणाले बढेको छ ।