पाँच गते भित्र सम्पूर्ण परिक्षा सक्न आदर्श माविलाई गल्याङ नगरपालिकाको निर्देशन

३ चैत,गल्याङ । स्याङ्जाको गल्याङ नगरपालिकाले यही चैत्र पाँच गतेभित्र विद्यालयमा परीक्षा सक्न गल्याङको आदर्श आवासीय माध्यमिक विद्यालयलाई पुनः निर्देशन दिएको छ ।

गल्याङ नगरपालिका शिक्षा युवा तथा खेलकुद शाखाले गल्याङमा रहेको आदर्श आवासीय माध्यमिक विद्यालयलाई पाँच गते भित्र नै परिक्षा सक्न फेरी निर्देशन दिएको हो । यसअघि फागुन २० गते नेपाल सरकारको शिक्षा विज्ञान तथा प्रविधि मन्त्रालयको निर्देशन अनुसार फागुन २३ गते बसेको प्रधानाध्यापकको बैठकले चैत्र पाँच गतेसम्ममा परीक्षा सक्न तालिका दिएको थियो ।

नगरपालिका शिक्षा समितिको निर्देशनको अवज्ञा गर्दै आदर्श आवासीय माध्यमिक विद्यालयले चैत्र २ गते देखि मात्रै परीक्षा सुरु गरी चैत्र नौ गते सक्ने तालिका तय गरेको थियो । नगर शिक्षा शाखाले चैत्र २ गते आइतबार विद्यालयलाई निर्देशन दिदै पाँच गते भित्र नै सक्न निर्देशन दिएको हो ।

शिक्षा शाखाका प्रमुख उपसचिव केदारराज आचार्यले दिएको निर्देशन पत्रमा पाँच गते भित्र नै परिक्षाका सम्पूर्ण कार्यक्रम पुरा गर्न भनिएको छ । स्वास्थ्यमा आउन सक्ने जोखिम न्युनिकरणका लागि केन्द्र सरकारको निर्देशनसँगै नगरपालिकाले पाँच गते भित्र परीक्षा सक्ने तालिका सार्वजनिक गरेको थियो । कोरोना भाइरसको संक्रमणबाट साबधानी अपनाउनुपर्ने भएकाले यस्तो निर्णय गरिएको नगरपालिकाले जनाएको छ ।

यसअघि विद्यालयले पाठ्यक्रम नसकिएको र विद्यालयमा आन्तरिक समस्या रहेको भन्दै तोकिएको मितिमा परीक्षा पुरा गर्न नसकिएको स्पष्टिकरण दिएको थियो । विद्यालयका प्रिन्सीपल कुलप्रसाद लामिछानेले शिक्षा शाखालाई बुझाएको स्पष्टिकरण पत्रमा असहज परिस्थिति सिर्जना भएमा परीक्षा स्थगीत गरी अनुकुल समयमा परीक्षा सञ्चालन गर्ने उल्लेख गरिएको छ ।