कोरोनाका कारण कोरियन एयरको उडान कटौती

४ चैत, काठमाडौं । साताको चार उडान गर्दै आएको कोरियन एयरले काठमाडौं उडानमा व्यापक कटौती गरेको छ ।सोमबारदेखि लागू हुने गरी मार्च महिनाभर कोरियन एयरले उडान कटौती गरेको हो ।

अब सोमबार हुने उडान बाहेक कूल ६ वटा उडान रद्द भएको कम्पनीले जनाएको छ । समाचारमा जनाए अनुसार कोरोना भाइरसविरुद्ध नेपाल सरकारले ल्याएको नीतिलाई सहयोग गर्न र अन्यन्तै कम बुकिङ रेटका कारण उडान रद्द गर्नु परेको कम्पनीले उल्लेख गरेको छ ।

यता टिकट काटिसकेका यात्रुले बीना कुनै जरिवाना टिकट रद्द वा उडान मिति सार्न सक्ने भएका छन् । सातामा एक उडान भने नेपाली यात्रुको सुविधाका लागि निरन्तरता दिइएको कम्पनीले जनाएको छ । कम्पनीले सोमबार, मंगलबार, शुक्रबार र शनिबार उडान गरिरहेको थियो ।