पनौतिमा कर्फ्यु हट्यो, जनजिवन सामान्य

५ चैत, काभ्रेपलाञ्चोक । टिप्पर चलाउने चालकलाई कडा कार्वाही गर्नुपर्ने मागसहित पीडित पक्षले शवपरीक्षण गर्न सहमति जनाएपछि पनौतीमा प्रशासनले मंगलबार बिहान ९ बजे देखि लगाएको कर्फ्यु हटेको छ ।

जिल्ला प्रशासन कार्यालय काभ्रेपलाञ्चोकले एक विज्ञप्ति निकालेर मंगलबार साँझ ८ बजेदेखि कर्फ्यु हटाइएको प्रमुख जिल्ला अधिकारी श्रवणकुमार तिमल्सिनाले जानकारी दिए । पनौतिमा कर्फ्यु हटेसँगै अहिले जनजिवन सामान्य बनेको छ ।

मंगलबार दिउँसो जिल्ला प्रशासन कार्यालय धुलिखेलमा भएको छलफलमा मान्छे मारेपछि क्षतिपूर्ति लिएर चालकलाई उन्मुक्ति दिनेभन्दा पनि चालकलाई कडाभन्दा कडा कारबाही गर्न मृतकका आफन्तले माग गरेका थिए ।

छलफलकै क्रममा प्रशासनले पीडितको माग अनुसार चालकलाई कारबाही गर्ने र व्यवसायीले कानुन अनुसारको क्षतिपूर्ति उपलब्ध गराउने सहमति भएपछि आफन्तले शव भने बुझेका थिए।