प्यूठानमा ३१ जना एसइईबाट वञ्चित

५ चैत, प्यूठान । यही चैत ६ गतेदेखि सञ्चालन हुन लागेको एसइई परीक्षामा प्युठान जिल्लाका ३१ विद्यार्र्थी परीक्षा दिन वञ्चित भएका छन् । विद्यालयमा ७५ प्रतिशत हाजिर नपुगेका, पढ्दापढ्दै बीचैमा छाडेका, बिहे गरी अन्यत्रै गएका जस्ता कारणले ती विद्यार्थीले एसइई परीक्षा दिन नपाउने शिक्षा विकास समन्वय एकाइ प्रमुख शिवराज पण्डितले बताएका छन् । गत जेठमा फाराम भरेका तर माघ मसान्तसम्ममा राजस्व बुझाउन नआएका विद्यार्थीलाई पनि परीक्षामा समावेश हुने नदिइने उनले बताएका छन् ।

जिल्लाबाट यस वर्ष चार हजार १४८ विद्यार्थी सहभागी हुँदै छन् जसमा दुई हजार २८८ छात्रा तथा एक हजार ८६० जना छात्र छन् । यस्तै ग्रेड वृद्धितर्फ १२४ विद्यार्र्थी सहभागी हुन लागेको पण्डितले जानकारी दिएका छन् । जिल्लाका सुस्तश्रवण शक्ति भएका र एक बालसुधारगृहका विद्यार्थी पनि परीक्षामा सहभागी हुन लागेको पण्डितले जानकारी दिएका छन् । परीक्षामा एक केन्द्रमा एक केन्द्राध्यक्ष र एक सहायक केन्द्राध्यक्ष हुने व्यवस्था छ । विद्यार्थीको सङ्ख्याका आधारमा निरीक्षक रहने उनको भनाइ छ ।