एसईई परीक्षा स्थगित !

५ चैत, काठमाडाैं ।  सरकारले माध्यमिक शिक्षा परीक्षा ‘एसईई’ स्थगित गरेको छ । कोभिड १९ रोकथाम तथा नियन्त्रण उच्च स्तरीय समितिका संयोजक उपप्रधानमन्त्री ईश्वर पोखरेलले एसईई परीक्षा स्थगित गर्ने निर्णय भएको बताएका छन् ।

यसअघि उक्त समितिले मानिसहरूको भिडभाड हुनसक्ने ठाउँहरू पनि अबको डेढ महिना बन्द गर्न निर्देशन दिने निर्णय गरेको थियाे । याे निर्णय भए लगतै बुधबार साँझ फेरि अर्को निर्णय सार्वजनिक गर्दै उपप्रधानमन्त्री पोखरेलले अब परीक्षाको अर्को मिति सूचना निकालेर जानकारी गराइने बताए।

एसईई परीक्षामा ४ लाख ८२ हजार ७०७ जना परीक्षार्थी सहभागी हुन लागेका थिए। परीक्षा बोर्डले स्वास्थ्यकर्मीसहित परीक्षाको सम्पूर्ण तयारी पूरा भएको बताएको थियो। बिहीवारबाट सुरु हुने परीक्षा अर्को शुक्रवारसम्म चल्ने तालिका सार्वजनिक भएको थियो।

कोरोना भाइरसको सम्भावित जोखिमलाई ध्यान दिँदै सरकारले बुधवार नै विद्यालयलहरू चैत मसान्तसम्म बन्द गर्ने निर्णय गरेको थियो। सत्तारूढ नेकपाको सचिवालय बैठकमा पनि कोरोना भाइरसको सम्भावित जोखिमहरूबारे छलफल भएको थियो।

सचिवालय बैठकपछि कोरोना भाइरसको सङ्क्रमण रोकथाम तथा नियन्त्रण उच्चस्तरीय समन्वय समितिको बैठकको निर्णयमा परीक्षासम्बन्धी बुँदा परिमार्जन गरिएको थियो।