सर्वोच्चमा शुक्रबारको दोस्रो सिफ्टको पेशी स्थगित

६ चैत्र, काठमाडौं । कोरोना भाइरस (कोभिड–१९) को सन्त्रासका कारण सरकारले २५ जनाभन्दा बढी मानिस भेला नहुन गरेको निर्णयअनुसार सर्वोच्च अदालतमा समेत अन्यौल सिर्जना भएको छ ।

प्रत्येक बुधबार मात्रै बस्ने सर्वोच्चको फुलकोर्ट बैठक यसै बिषयमा छलफलगर्न शुक्रबार बेलाइदै छ । शुक्रबार बस्ने फुलकोर्ट बैठकले त्यसपछिका केही समय बन्दी प्रत्यक्षीकरण र अत्यावश्यक बाहेक अन्य मुद्दाको सुनुवाइ स्थगनको निर्णय गर्न सक्ने सम्भावना रहेको सर्वोच्च अदालत स्रोतले जनाएको छ । गत मङ्गलबार नेपाल बार एशोसिएशनले अदालतका अत्यावश्यक बाहेकका अन्य काम कारबाही स्थगित गर्न सर्वोच्च अदालतसमक्ष माग गरेको थियो । त्यस्तै सर्वोच्च अदालत बार एशोसिएशनले पनि अदालतका काम कारबाही स्थगन गर्न माग गरेपछि परिस्थिति अनुसार निर्णय गर्न सर्वोच्च अदालतले शुक्रबार सर्वोच्चको फुलकोर्ट बैठक बोलाइएको छ ।

मुद्दाको चाप घटाउन दुई सिफ्ट इजलास चल्दै आएको सर्वोच्चमा शुक्रबार भने दोस्रो सिफ्टको पेशी समेत स्थगित गरिएको सर्वोच्च जनाएको छ । हाल विश्वव्यापी बनिरहेको कोरोनाभाइरस संक्रमणको सम्भावित नियन्त्रणका लागि धेरैजसो देशहरूले आन्तरिक तयारीलाई तीव्र गरेका छन् । यो संक्रमणको त्रास फैलिएसँगै नेपालमा पनि सरकारले उच्च सतर्कता अपनाउन आग्रह गरिरहेको छ ।