अस्थायी रुपमा लकडाउनको तयारी

७ चैत, काठमाडौं । विश्वव्यापी आतंक बनेको कोभिड–१९ अर्थात कोरनाभाइसरले नेपाली जनजीवनसमेत आक्रान्त बनाउन थालेको छ । सरकारले पछिल्ला दिनमा गर्न थालेका निर्णय र दिएका निर्देशनले जनमानसमा संन्त्राश बढाउन थालेको छ ।

यसबाट जोगिन सरकारले अस्थायी रुपमा देश लकडाउन गर्ने तयारी गरेको स्रोतले बताएको छ । चैत ५ गते साँझ अकस्मात एसईईलगायत सबै शैक्षिक गतिविधि ठप्प पार्ने निर्णय गरेपछि एकाएक जनजीवन भयग्रस्त बनेको हो ।

आज फेरि सरकार सरकारी र निजी कार्यालयसमेत बन्द गर्ने निर्णयमा पुग्दै छ । यसअघि आजै सर्वाेच्च अदालतले देशैभरका अदालतहरु दुई साता बन्द गर्ने निर्णय गरिसकेको छ ।

साँझ ६ बजे प्रधानमन्त्री के पी ओलीले राष्ट्रको नाममा गर्ने संवोधनमा यस्तो जानकारी दिइने स्रोतको दावी छ । जनतालाई पूर्व जानकारी नदिई हठात यस्तो निर्णय गर्दा राजधानी लगायत देशैभरि कालोबजारी बढेको छ ।

यस्तै, दैनिक उपभोग्य सामग्रीको समेत अभाव बढेको छ । छिमेकी चीनबाट सुरु भएको यो भाइरस अहिले संसार भर फैलिएको छ । दक्षिणी छिमेकी भारतमा समेत कोरोना भाइरसबाट चार जनाको मृत्यु भइसकेको छ । त्यसैले खुला सीमाका कारण संक्रमण भित्रन सक्ने भन्दै सरकार कडा भएको बताइएको छ ।

स्रोतका अनुसार आज सरकारले दुबै छिमेकीसँगको नाका दुई साता सिल गर्ने निर्णय गर्ने छ । यसबारे कूटनीतिक तहमा कुरा भइसकेको बताइएको छ । तर आयात निर्यात भने यथावत रहने स्रोतको दाबी छ ।