गड्डाचौकी नाका भएर नेपाल आएका २ जना अस्पताल भर्ना

८ चैत, धनगढी । सुदूरपश्चिको गड्डाचौकी नाका भएर शनिबार नेपाल भित्रिएका २ जनालाई उच्च ज्वरो आएपछि अस्पतालमा भर्ना गरिएको छ ।

कोरोना भाइरस ‘कोभिड-१९’ संक्रमणको आशङ्कामा दुई जनालाई कञ्चनपुरस्थित महाकाली अस्पतालको आइसोलेसन वार्डमा भर्ना गरिएको हो । प्रहरीका अनुसार दुबै गड्डाचौकी नाकाबाट नेपाल भित्रिएका थिए । सीमा नाकामा परीक्षणका क्रममा ज्वरो उच्च देखिएपछि दुवै जनालाई महाकाली अस्पतालमा भर्ना गरिएको महाकाली अस्पतालका मेडिकल सुपरिटेन्डेन्ट हरिकृष्ण श्रेष्ठले बताए ।

उनीहरुको खकारको नमुना सङ्कलन गरेर पठाइएको जानकारी दिए । ‘हामीले धनगढी पठाएका छौँ । धनगढीबाट काठमाडौँ पठाइन्छ’ उनले भने, ‘नमुनाको रिर्पोट आएपछि मात्रै थप कुरा थाहा हुन्छ ।’ यसअघि कैलालीको सेतीप्रादेशिक अस्पतालमा पनि तीनजना भर्ना भएका थिए । उनीहरुको पनि खकार संकलन गरी राष्ट्रिय जनस्वास्थ्य प्रयोगशाला पठाइएको छ ।