बादी समुदायलाई पत्रकार सन्दीप विकले गरे मास्क वितरण

९ चैत, दुल्लु । दैलेखका पत्रकार सन्दीप विकले नारायण नगरपालिका–६ मा रहेको नमूना बादी समुदायका नागरिकलाई मास्क वितरण गरेका छन् । नेपाल पत्रकार महासङ्घ दैलेखका साधारण सदस्यसमेत रहेका विकले शनिबार बस्तीमै गएर मास्क वितरण गरेका हुन् ।

विश्वव्यापीरूपमा फैलिरहेको कोरोना भाइरसको सङ्क्रमणबाट बच्नका लागि मास्क उपयोगी हुने भएकाले दलित बस्तीमा मास्क वितरण गरेको पत्रकार विकले बताए । “यो बादी समुदाय आर्थिक चपेटामा परेको छ”, उनले भने, “बस्तीमा छाक टार्नसमेत धौ–धौ छ । मास्क किन्ने पैसा कहाँबाट पाउनु । त्यसैले केही मलम लगाउनका लागि भए पनि मास्क वितरण गरेको हुँ ।” करीब ३० घर जति रहेको यो बादी समुदाय गाडीको सामान लोड–अनलोड गरेर गुजारा गर्दै आएका छन् ।