प्रधानमन्त्री ओलीलाई गगनको खुलापत्र

१२ चैत्र, काठमाडौं । नेपाली कांग्रेसका युवा नेता गगन थापाले कोरोना संक्रमणको वास्तविक अवस्था पत्ता लगाउन परीक्षणको दायरा बढाउनुपर्ने भन्दै प्रधानमन्त्री केपी ओलीलाई खुलापत्र संप्रेषण गरेका छन् ।

संक्रमण फैलिएपछि स्वदेश भित्रिएका सबैको कोरोना परीक्षण नगरी ढुक्क हुने अवस्था नरहेको स्पष्ट गर्दै नेता थापाले भनेका छन्– थोरै मानिसमा मात्र पोजेटिभ देखियो भनेर खुशी नहाऔं, जति धेरैमा परीक्षण हुन्छ त्यति नै बढी स्पष्ट हुन सकिन्छ । खासगरी केही दिनयता भारतीय नाकाबाट भित्रिएकाहरुको स्वास्थ्य परीक्षण नगरेकोमा सरकारको लापरवाही डरलाग्दो हुने चेतावनी दिंदै थापाले भनेका छन– समयमै सचेत भइएन भने भयावह स्थिति पनि आउन सक्छ, प्रधानमन्त्रीज्यू, ध्यान पुगोस् ।

यस्तै लापरवाही ढंगले काम गरियो भने अहिलेको महासंकटसँग जुध्न कठिन छ भन्दै थापाले लेखेको खुलापत्रमा भनिएको छ– यतिको तयारीले मात्रै हामी कोरोना विरुद्ध लड्न सक्नेवाला छैनौं । पूर्वस्वास्थ्य मन्त्रीसमेत रहेका नेता थापाले कोरोनाविरुद्धको महासंग्राममा आफ्नो पार्टी र व्यक्तिगत रुपमा सहयोग र समर्थन रहने पनि स्पष्ट पारेका छन् ।सबैभन्दा महत्वपूर्ण पक्ष भनेको विदेशबाट आएकाहरुको राम्रो परीक्षण र क्वारेण्टाइन नै हो भन्दै थापाले सरकारले पर्याप्त मात्रामा चिकित्सीय सामग्रीको व्यवस्था गर्नुपर्ने भन्दै सबै चिकित्सकलाई सुरक्षाको प्रत्याभूति दिनुपर्ने सुझाव समेत दिएका छन् ।

सरकारले शंकास्पद बिरामी खोज्ने प्रभावकारी रणनीति नबनाएसम्म ढुक्क हुने अवस्था नरहेको भन्दै फ्रि क्लिनिक, आइसोलेसन वार्ड, कोरोना अस्पताल स्थापना र तोकिएका अस्पतालमा आईसीयूको उचित व्यवस्था गर्नुपर्नेमा नेता थापाले जोड दिएका छन् ।